Read De Bibel JHF Spricha 23 Bible Online

Spricha 23 - De Bibel JHF bible

Spricha 23

¹Wan du die hansatst, om met eenem Harscha to äten, soo acht doaropp, wäm du ver die hast;

²un sat een Massa aun dien Hauls, wan du jierich best.

³Lot die nich jankren no siene Lakjabeskje, dan see sent eene faulsche Speise.

⁴Bemieej die nich, rikj toowoare, lot auf von diene Kluakheit.

⁵West du diene Uagen doanopp flieejen loten, un kjikj, wajch es daut? Dan secha haft daut Flichten aus een Odla, dee em Himmel flicht.

⁶At nich daut Broot vom Scheelenden, un lot die nich jankren no siene Lakjabeskje.

⁷Dan woo hee daut aufmat en siene Seel, soo es hee, «at un drinkj», sajcht hee to die, oba sien Hoat es nich met die.

⁸Dien Aufbietsel, däm du jejäten hast, motst du utspieen, un diene frintliche Wieed woascht du velieren.

⁹Räd nich to de Uaren von eenem Noa, dan hee woat diena kluake Wieed veachten.

¹⁰Veschuw nich de oole Jrensen, un enne Felda de Weise drinj nich en.

¹¹Dan äa Erleesa es stoakj; hee woat äaren Rajchtstriet jäajen die fieren.

¹²Brinj dien Hoat häa too Zucht, un diene Uaren no de Wieed de Erkjantnis.

¹³Nemm däm Jung nich de Zuchtijung; wan du am met de Wäd schleist, woat hee nich stoawen.

¹⁴Du schleist am met de Wäd, un du radst siene Seel von däm Doot (Unjawelt).

¹⁵Mien Sän, wan dien Hoat weis es, soo woat uk dien Hoat sikj freien;

¹⁶un miene Nieren woaren froo sennen, wan diene Leppen rajcht räden.

¹⁷Dien Hoat beneid nich de Sinda, sonda beiewa sikj jieda Dach, om de Angst Gottes.

¹⁸Woarhauft, daut jeft eene Tookunft, un diene Hopninj woat nich venicht woaren.

¹⁹Du hia, mien Sän, un woa weis, un leid dien Hoat opp däm rajchten Wajch.

²⁰Sie nich unja Wiensupa, noch unja dän, dee Fleesch vekwose;

²¹dan een Drinkja un een Vekwosa veoame, un Schleepaja kjleet sikj en Lumpe.

²²Horch opp dienen Voda, dee die jebuaren haft, un veacht diene Mutta nich, wan see oolt jeworden es.

²³Kjeep Woarheit un vekjeep dee nich, Weisheit un Zucht un Vestaunt.

²⁴De Voda von eenem Jerajchten freit sikj sea; un wia eenem Weisen jebuaren haft, dee freit sikj äwa am.

²⁵Muchten sikj freien dien Voda un diene Mutta, un sea freien, dee die jebuaren ha!

²⁶Jeff mie, mien Sän, dien Hoat, un lot diene Uagen jefaulen ha aun miene Wäaj!

²⁷Dan de Hua es eene deepe Kul un de Framde een enja Borm;

²⁸jo, see luat aus een Reiba, un see vemieet de Truloose unja de Menschen.

²⁹Wäa haft Ach, wäa haft Wee, wäa Zank, wäa Kloagen, wäa Wunden onen Uasoak? Woa sent aunjestrenjde Uagen?

³⁰Dee lot biem Wien setten, dee komen, om Mischjedrenkj too proowen.

³¹Kjikj däm Wien nich aun, wan hee root schient, wan hee em Kuffel blenkjat, leicht raufrant.

³²Sien Enj es, daut hee bit aus eene Schlang un stakjt aus eene Otta.

³³Diene Uagen woaren framde Dinj seenen, un dien Hoat woat vekjieede Dinj räden.

³⁴Un du woascht sennen aus eena, dee em Hoaten vom Mäa licht, un aus eena, dee doa licht opp de Spetz von eenem Säajelboom.

³⁵«See schluagen mie, daut deed mie nich wee; see priejelde mie, ekj feeld daut nich. Wanea woa ekj oppwakjen? Ekj well daut wada doonen, well am noch mol oppsäkjen».