Read De Bibel JHF Spricha 3 Bible Online

Spricha 3 - De Bibel JHF bible

Spricha 3

¹Mien Sän, vejat nich miene Belierunk, un dien Hoat bewoa miene Jebooten.

²Dan de Lenj de Doag un Joaren vom Läwen un Fräd woaren see die vemieren. -

³Jnod un Woarheit muchten die nich veloten; binj dee om dien Hauls, schriew dee opp de Tofel en dienem Hoat;

⁴soo woascht du Gonst finjen un goode Ensecht enne Uagen Gottes un de Menschen. -

⁵Vetru oppem Harn met dienem gaunzem Hoat, un stett die nich opp dienem Vestaunt.

⁶Erkjan am opp aul diene Wäaj, un hee woat jlikj moaken diene Stiej. -

⁷Sie nich weis en diene Uagen, fercht däm Harn un bliew wajch vom Beesen:

⁸Daut woat heelboa sennen fa dienem Nowel un Sauft fa diene Jläda (Knoakes). -

⁹Iea däm Harn von dienem Vemäajen un von aul dienem Ieeschten Ennkomen;

¹⁰soo woaren diene Spikjasch sikj fellen met Äwafluss, un diene Krucken vom Wien äwaranen.

¹¹Mien Sän, velot nich de Zucht Gottes, un lot die siene Zucht nich vedrisse.

¹²Dan wäm de Har leeft, däm zuchtijt hee, un zwoa aus een Voda däm Sän, aun däm hee Wooljefaulen haft. -

¹³Jlekjseelich dee Mensch, dee Weisheit jefungen haft, un de Mensch, dee Vestentnis erlangt!

¹⁴Dan äa Jewenst es bäta aus de Jewenst von Selwa, un äa Jewenst bäta aus fienet Golt;

¹⁵kostboara es see aus Parlen, un aules, waut du die wenschen muchst, es met äa em Wieet nich to vejlikjen.

¹⁶Een langet Läwen es en äare Rajchte, en äare Linkje Rikjtum un Iea.

¹⁷Äare Wäaj sent leeftolje Wäaj, un aule äare Stiej sent Fräd.

¹⁸Een Läwensboom es see fa dän, dee ar aunjriepen, un wäa ar fausthelt, es jlekjlich.

¹⁹De Har haft derch Weisheit de Ieed jejrind, un derch Ensecht de Himmel faustjestalt.

²⁰Derch siene Erkjantnis sent de Deepe väajebrocht, un de Wolkjen drepplen Deiw rauf. -

²¹Mien Sän, lot ar nich von diene Uagen gonen, bewoa eenen kluaken Rot un Besenninj;

²²soo woaren see Läwen sennen fa diene Seel un Schmuck dienem Hauls.

²³Dan woascht du en Sechaheit dienen Wajch gonen, un dien Foot woat nich aunsteeten.

²⁴Wan du die hanlajchst, woascht du die nich vefieren; un lijst du, soo woat dien Schlop seet sennen.

²⁵Enjst die nich ver plazlichem Schrakj, noch fa de Vewustunk de Gottloose, wan see komen;

²⁶dan de Har woat dien toovetruen sennen, un woat dienen Foot vere Faul bewoaren.

²⁷Hool kjeen Goodet däm trigj, däm daut tookjemt, wan daut enne Macht diene Henj steit, daut to doonen. -

²⁸Saj nich too dienem Näakjsten: Go han un komm wada, un morjen well ekj jäwen, doa daut doch bie die es. -

²⁹Schmäd nuscht Beeset jäajen dienen Näakjsten, wäarend hee bie die vetruensvoll wont. -

³⁰Striet nich met eenem Mensch onen Uasoak, wan hee die nuscht Beeset aunjedonen haft. -

³¹Beneid nich däm Jewault doonendem Maun, un erwäl kjeene von siene Wäaj. -

³²Dan de Vekjieeda es däm Harn een Aufschu, oba sien Jeheemnis es bie dee Opprechtje.

³³De Fluch Gottes es em Hus de Gottloose, oba hee säajent de Wonunk de Jerajchte.

³⁴Äwa de Spata spott hee, oba däm Deemootjen jeft hee Jnod.

³⁵De Weise oawen Iea, oba de Noaren droagen de Schaund doavon.