Read De Bibel JHF Spricha 30 Bible Online

Spricha 30 - De Bibel JHF bible

Spricha 30

¹De Wieed von Agur, vom Sän Jakes, de Spruch. Daut räd de Maun too Ithiel, too Ithiel un Ukal:

²Woarhauft, ekj sie onveninftja aus irjent eena, un Menschen Vestaunt ha ekj nich.

³Un Weisheit ha ekj nich jelieet, daut ekj Erkjantnis von Heilje besett.

⁴Wäa es noppjestäajen em Himmel un raufjefoaren? Wäa haft däm Wint en siene Fusten jesaumelt? Wäa de Wota en een Duak jebungen? Wäa haft oppjerecht aule Enj de Ieed? Waut es sien Nomen, un waut es de Nomen von sienem Sän, wan du daut weetst?

⁵Aule Räd Gottes sent jereinicht; een Schild es hee dän, dee opp am true.

⁶Doo nuscht to siene Wieed doatoo, doamet hee die nich stroft un du aus Läajna jefungen woascht.

⁷Tweeatlei bedd ekj von die; vewäa mie daut nich, ea ekj stoaw:

⁸Faulschheit un Läajeswieed doo von mie wajch; Oamoot un Rikjtum jeff mie nich, fooda mie met däm eenfachen Broot;

⁹doamet ekj nich saut woa un die veläj un saj: Wäa es de Har? Un doamet ekj nich veoam un stäl, un mie vejriep aun däm Nomen von mienem Gott.

¹⁰Bepluda eenen Kjnajcht nich bie sienem Haren, doamet hee die nich veflucht, un du die vesindichst.

¹¹Een Jeschlajcht, daut sienen Voda veflucht un siene Mutta nich säajent;

¹²een Jeschlajcht, daut rein es en siene Uagen un doch nich jewoschen von sienem Drakj;

¹³een Jeschlajcht - woo stolt sent siene Uagen, un siene Ziepasch erhäwen sikj! -

¹⁴Een Jeschlajcht, däm siene Tänen Schwieeta sent, un Massasch sien Jebiss, om wajchtofräten de Älendje von de Ieed un de Oame ut de Medd de Menschen!

¹⁵De Blootsua haft 2 Dajchta: Jeff häa! Jeff häa! 3 sent daut, dee nich saut woaren, 4, dee nich sajen: Jenuach!

¹⁶De Scheol un de veschlootna Muttalief, de Ieed, dee daut Wota nich saut woat, un daut Fia, daut nich sajcht: Jenuach!

¹⁷Een Uag, daut däm Voda vespott un däm Jehuarsom jäajen de Mutta veacht, daut woaren de Kraujen vom Stroom uthaken un de junge vom Odla fräten.

¹⁸3 sent daut, dee too wundaboa fa mie sent, un 4, dee ekj nich erkjan:

¹⁹De Wajch de Odlasch aum Himmel, de Wajch von eene Schlang opp däm Steen, de Wajch von eenem Schepp em Hoaten vom Mäa, un de Wajch von eenem Maun met eene Junkfru. -

²⁰Aulsoo es de Wajch von eene ehebräakjarische Fru: See at, un wescht äa Mul un sajcht: Ekj ha kjeen orrajcht begonen.

²¹Unja 3 zettat de Ieed, un unja 4 kaun see daut nich uthoolen:

²²Unja eenem Kjnajcht, wan hee Kjennich woat, un eenem Noa, wan hee von Broot saut es;

²³unja eene jehausste Fru, wan see too Fru jenomen woat, un eene Deenstmejal, wan see äare Harin beoawt.

²⁴4 sent de kjliene de Ieed, un doch sent see met Weisheit jetieekjent:

²⁵De Eemskje, een nich stoakjet Volkj, un doch moakt see aum Somma äa Äten reed;

²⁶de Steen Dackse, een nich kjraftjet Volkj, un doch saten see äa Hus opp däm Steen;

²⁷de Heischrakjen ha kjeenen Kjennich, un doch trakjen see aula toop eena nom aundren ut;

²⁸de Äajdakjs kaust du met de Henj jriepen, un doch es see enne Paulausten de Kjennichs.

²⁹3 ha eenen scheenen Schrett, un 4 eenen stautschen Gank:

³⁰De Leiw, de Held unja de Tieren, un dee fa nuscht trigj dreit;

³¹de Hon, ooda de Bock; un een Kjennich, bie däm daut Kjrichshäa es.

³²Wan du onbedocht jehaundelt hast, endäm du die erhoowst, ooda wan du Beeset dochst: De Haunt oppem Mul!

³³Dan de Malkj staumpe jeft Botta, un daut drekjen de Näs jeft Bloot, un daut drekjen von Oaja jeft Striet.