Read De Bibel JHF Spricha 31 Bible Online

Spricha 31 - De Bibel JHF bible

Spricha 31

¹De Wieed von Lemuel, däm Kjennich von Massa, met dee siene Mutta am belieed:

²Waut, mien Sän, un waut, Sän von mienem Lief, un waut, Sän von mienem Vespräakjen?

³Jeff nich de Frues diene Krauft, noch diene Wäaj dän, dee däm Kjennich vedoawen.

⁴Daut jeziemt sikj nich fa de Kjennichs, Lemuel, nich fa Kjennichs, Wien to drinkjen, noch fa de Ferschten, too froagen: Wua es stoakjet Jedrenkj?

⁵Doamet hee nich drinkjt un daut Väajeschräwne vejat, un vedreit de Rajchtsach aule Kjinja vom Älent: -

⁶Jeft stoakjet Jedrenkj däm, dee aum Omkomen es, un Wien dän, dee bedrekjte Seelen sent:

⁷Hee drinkj, un vejat siene Oamoot un jedenkjt siene Lieden nich mea.

⁸Doo dien Mul ver däm Stommen op, fa de Rajchtsach aula Velotne.

⁹Doo dien Mul op, recht jerajcht, un schauf Rajcht däm Älenden un däm Oamen.

¹⁰Eene pienje Fru, wäa woat dee finjen? Dan äa Wieet steit wiet äwa Koralen.

¹¹Äa Maun sien Hoat vetrut opp ar, un aun Jewenst woat daut am nich fälen.

¹²See bewiest am goodet un nuscht Beeset aule Doag en äarem Läwen.

¹³See sieekjt Woll un Flauss, un oabeit wellich met äare Henj.

¹⁴See es aus Haundelsschäp, von wiet brinjt see Broot bie.

¹⁵Un see steit opp, wan daut noch Nacht es, un bestemt daut Äten, fa äa Hus un daut Doageswoakj fa äare Deenstmejales.

¹⁶See jeit no een Flekj un kjaft daut; von de Frucht von äare Henj plaunt see eenen Wiengoaden.

¹⁷See ombinjt äare Lenden met Krauft un stoakjt äare Oarms:

¹⁸See moakjt, daut äa Jewenst goot es: De Nacht jeit äa Licht nich ut;

¹⁹see lajcht äare Henj aun däm Wäwstock, un äare Finja foten daut Spolkje.

²⁰See breet äare Henj ut fa de Älendje un strakjt äare Henj däm Oamen entjäajen.

²¹See haft fa däm Schnee ver äarem Hus nich Angst, dan äa gaunzet Hus es en Scharlach jekjleet.

²²See moakt sikj selfst Dakjen; Lienzeich un Purpur sent äare Kjleeda.

²³Äa Maun es enne Dooasch bekaunt, endäm hee bie de Eltestasch von Launt sett.

²⁴See moakt Hamden un vekjaft dee, Jirtel jeft see däm Haundelsmaun.

²⁵Krauft un Huagheit es äa Kjleet, un see lacht äwa däm komenden Dach.

²⁶See moakt äa Mul met Weisheit op, un leeftolje Lia es opp äare Tung.

²⁷See bewoakt däm Engank en äarem Hus un at nich daut Broot de Fulheit.

²⁸Äare Säns stonen opp un spräakjen ar jlekjlich, äa Maun steit opp un riemt ar:

²⁹«Väl Dajchta ha kluak jehaundelt, oba du hast dee aula äwatroffen!»

³⁰De Leeftol es Droch, un de Scheenheit es (nuscht) een Wintblose; eene Fru, daut däm Harn fercht, dee woat jepreist (jeloft) woaren.

³¹Jeft ar von dee Frucht äare Henj; un enne Dooasch woaren äare Woakjen ar lowen!