Read De Bibel JHF Spricha 4 Bible Online

Spricha 4 - De Bibel JHF bible

Spricha 4

¹Hieet, Säns, de Zucht vom Voda, un moakjt opp, om Ensecht to kjrieen!

²Dan eene goode Lia jäw ekj junt: Velot miene Belierunk nich.

³Dan een Sän sie ekj mienem Voda jewast, een zoata un eensja von miene Mutta.

⁴Un hee lieed mie un säd to mie: Dien Hoat hool miene Wieed faust; beoobacht miene Jebooten un läw.

⁵Jewenst Weisheit, jewenn Vestaunt; vejat nich un go nich auf von dee Räden, von mienem Mul.

⁶Velot an nich, un see woaren die bewoaken; leew an, un see woaren die bewoaren.

⁷De Weisheit Aunfank es: Jewenst Weisheit; un om aules, waut du jewonnen hast, jewenn Vestaunt.

⁸Hool an huach, un see woat die erhäwen; see woat die too Iea brinjen, wan du äa em Oarm nemst.

⁹See woat dienem Haupt eenen leeftoljen Kraunz veliee, woat die eene prajchtje Kroon doaräkjen.

¹⁰Hea, mien Sän, un nemm miene Räd aun! Un de Läwensjoaren woaren sikj die vemieren.

¹¹Ekj unjawies die enne Wäaj de Weisheit, un leid die oppe jerajchte Bon.

¹²Wan du jeist, woat dien Schrett nich beenjt woaren, un wan du ranst, woascht du die nich enjsten.

¹³Hool faust aun de Zucht, lot ar nich loos; bewoa ar, dan see es dien Läwen. -

¹⁴Bejäf die nich opp däm Stich de Gottloose, un go nich opp däm Wajch de Beese.

¹⁵Lot an foaren, go nich doanopp; drei die von am auf un go vebie.

¹⁶Dan see schlopen nich, wan see nuscht Beeset jedonen, un äa Schlop woat an jeraupt, wan see kjeenem toom Faul jebrocht ha.

¹⁷Dan see äten Broot de Gottloosichkjeit, un drinkjen Wien de Jewault.

¹⁸Oba de Stich de Jerajchte es aus daut jlenzende Morjenlicht, daut emma dacha dacht bat toom vollen Dach.

¹⁹De Wajch de Gottloose es soo aus de Diestanis; see erkjanen nich, wuaräwa see sikj enjsten.

²⁰Mien Sän, moakj opp miene Wieed, neij dien Ua to miene Räd.

²¹Lot an nich von diene Uagen aufgonen, bewoa an em Ennalichen von dienem Hoat.

²²Dan see sent daut Läwen, dee ar finjen, un Jesuntheit äarem gaunzem Fleesch. -

²³Bewoa dien Hoat mea aus aules, waut too bewoaren es; dan von am ut sent de Utjenj toom Läwen.

²⁴Doo von die de Vekjieetheit vom Mul, un de Vedreide Leppen doo wajch von die.

²⁵Lot diene Uagen jlikjwajch kjikjen, un diene Ziepasch jlikj wajch ver die kjikjen. -

²⁶Moak jlikj de Bon fa dienem Foot, un aule diene Wäaj sent Jlikj;

²⁷bieej nich Rajchtsch noch Linkjsch auf, drei dienen Foot auf vom Beesen.