Read De Bibel JHF Spricha 5 Bible Online

Spricha 5 - De Bibel JHF bible

Spricha 5

¹Mien Sän, hia opp miene Weisheit, neij dien Ua to miene Ensecht,

²om Besonnenheit too beoobachten, un doamet diene Leppen Erkjantnis bewoaren.

³Dan Honnich lakjt von de Leppen de Framde, un glauta aus Eelj es äa Mulbän;

⁴oba äa Latztet es betta aus Warmät, schoap aus een tweischniedjet Schwieet.

⁵Äare Feet stieen nom Doot rauf, aum Scheol hoolen äare Schräd.

⁶Doamet see nich däm Wajch toom Läwen ennschleit, schwäakjte äare Bonen, onen daut see daut weet.

⁷Dan nu, jie Säns, hieet opp mie, un got nich auf von de Wieed ut mienem Mul!

⁸Hool von äa wiet auf dienen Wajch, un go nich no de Däa von äarem Hus:

⁹Doamet du nich aundre diene Bläajsels jefst, un diene Joaren däm Grausomen;

¹⁰doamet Framde sikj nich saut moaken aun dienem Vemäajen, un dien mäjvolla Jewenst nich kjemt en een Utlenda Hus;

¹¹un du nich stänst bie dienem Enj, wan dien Fleesch un dien Lief doahan veschwinjen, un sajchst:

¹²Woo ha ekj de Zucht jehaust, un mien Hoat haft de Tookunft veacht!

¹³Un ekj ha nich jehieet opp de Stemm von miene Liera, un mien Ua nich tojehieet miene Lierasch.

¹⁴Weinich fäld, soo wia ekj en aulem Beesen jewast, enne medd de Vesaumlunk un enne Jemeent.

¹⁵Drinkj Wota ut diene Zista un ranendet ut dienem Borm.

¹⁶Muchten no buten sikj utjeeten diene Kjwalen, diene Wotastreem opp de Gaussen.

¹⁷Die auleen sellen see jehieren, un nich Framde met die.

¹⁸Diene Kjwal es jesäajent, un erfrei die aun de Fru von diene Jugent;

¹⁹dee leeftolje Herschkoo un truhoatje Ree - äare Brosten muchten die too aula Tiet berausche, erjats die emma en äare Leew.

²⁰Un wuarom saust du, mien Sän, die aun eene Framde erjatsen, un däm Bossem eene Framde ommoarmen? -

²¹Dan ver de Uagen Gottes sent eenem jiedrem siene Wäaj, un aul siene Jleise wäajt hee auf.

²²De ieejne Misdoten woaren am, däm Gottloosen, fangen, un enne Faslen von siene Sinden woat hee faustjenomen woaren.

²³Stoawen woat hee, wiels am Zucht mangelt, un en siene Groote Noaheit woat hee doahan tomlen.