Read De Bibel JHF Spricha 7 Bible Online

Spricha 7 - De Bibel JHF bible

Spricha 7

¹Mien Sän, bewoa miene Wieed, un hool bie die miene Jebooten;

²bewoa miene Jebooten un läw, un miene Belierunk aus dien Uagaupel.

³Binj dee om dien Finja, schriew dee opp de Tofel en dienem Hoat.

⁴Saj to de Weisheit: Du best miene Sesta! Un saj toom Vestaunt: Du best mien Vewaunta;

⁵doamet see die bewoaren ver de framde Fru, ver de Framde, dee, äare Wieed glaut moakt. -

⁶Dan aun däm Fensta von mienem Hus kjikjt ekj derch miene Sprote rut;

⁷un ekj sach unja de Eenfeltje, bemoakjt unja de Säns eenen onvestendjen Jinjlinkj,

⁸dee han un häa jinkj opp de Gauss, aun äare Akj, un däm Wajch no äarem Hus jinkj,

⁹enne Dunkelheit, aum Owent vom Dach, enne Medd de Nacht un enne Dunkelheit.

¹⁰Un kjikj, eene Fru kjemt am entjäajen em Aunzuch eene Hua un met vestoaknem Hoat.

¹¹See es liedenschoftlich un onbandich, äare Feet bliewen nich en äarem Hus;

¹²boolt es see buten, boolt oppe Gaussen, un bie jiedre Akj luat see. -

¹³Un see jreep am un kust am, un met onveschämtem Aunjesecht säd see to am:

¹⁴Frädensopfa lagen opp mie, vondoag ha ekj mien Vespräakjen betolt;

¹⁵doarom sie ekj utjegonen, die entjäajen, om dien Jesecht to seenen, un die ha ekj jefungen.

¹⁶Met Teppiche ha ekj mien Bad reed jemoakt, met bunte Dakjen von ägiptischem Twäarem;

¹⁷ekj ha mien Loaga besprenjt met Murren, Zippelfie un Kerneel.

¹⁸Komm, wie wellen ons en Leew berausche bat aun däm Morjen, un Leeftolich ons erjatsen.

¹⁹Dan de Maun es nich Tus, hee es opp eene wiede Reis jegonen;

²⁰hee haft däm Jeltbiedel en siene Haunt jenomen, aum Dach de Vollmon woat hee nohuskomen.

²¹See veleid am derch äa fälet Beräde, reet am fot derch Schmeichlen äare Leppen.

²²Opp eenmol jinkj hee ar no, aus een Oss too Schlachtbenkj jeit, un aus Feetfassle too Zuchtijung däm Noa deenen,

²³bat een Feila siene Läwa vespoolt; aus een Voagel no de Schlenj ielt un nich weet, daut et sien Läwen kost. -

²⁴Un nu, jie Säns, hieet opp mie, un horcht opp de Wieed von mienem Mul!

²⁵Dien Hoat drei sikj nich auf no äare Wäaj, un err nich omhäa opp äare Stiej!

²⁶Dan väl Jefolne haft see toom Faul jebrocht, un väl sent aule äare Omjebrochte.

²⁷Äa Hus sent Wäaj toom Scheol, dee rauffuaren no de Komasch de Doodes.