Read De Bibel JHF Spricha 8 Bible Online

Spricha 8 - De Bibel JHF bible

Spricha 8

¹Roopt nich de Weisheit, un lat nich de Ensecht äare Stemm erschaulen?

²Bowen oppe Hecht aum Wajch, doa woa de Stiej toopsteeten, haft see sikj hanjestalt.

³Aune Sied de Dooasch, woa de Staut sikj opmoakt, aum Engank de Puat schricht see:

⁴No junt, jie Mana, roop ekj, un miene Stemm jeit aun de Menschenkjinja.

⁵Lieet Kluakheit, jie Eenfeltje, un jie Noaren, lieet Vestaunt!

⁶Hieet! Dan vetraflichet well ekj räden, un daut opdoonen miene Leppen saul opprechtich sennen.

⁷Dan mien Mulbän räd Woarheit ut, un Gottloosichkjeit es miene Leppen een Fräfel.

⁸Aule Wieed von mienem Mul sent opprechtich; daut es nuscht Vedreidet un Vekjieedet en an.

⁹See sent aula däm Vestendjen rajcht, un krakjt dän, dee Erkjantnis erlangt ha.

¹⁰Nämt miene Zucht aun, un nich Selwa, un Erkjantnis leewa aus utjelesnet, reinet Golt.

¹¹Dan Weisheit es bäta aus Korale, un aules, waut maun wenschen mucht, sent äa nich to vejlikjen. -

¹²Ekj, Weisheit, bewon de Kluakheit, un finj de Erkjantnis de Besennenheit.

¹³De Forcht Gottes es: Daut Beese haussen. Stolt un Huachmoot un däm Wajch vom Beesen un daut Mul de Vekjieetheit hauss ekj.

¹⁴Miene sent Rot un Ensecht; ekj sie de Vestaunt, mien es de Krauft.

¹⁵Derch mie rejieren Kjennichs, un Ferschten trafen jerajchte Entscheidunge;

¹⁶derch mie harschen Harscha un Adelje, aule Rechta de Ieed.

¹⁷Ekj leew, dee mie leewen; un dee mie iewrich sieekjen, woaren mie finjen.

¹⁸Rikjtum un Iea sent bie mie, bliewendet Goot un Jerajchtichkjeit.

¹⁹Miene Frucht es bäta aus fienet Golt un jereinichtet Golt, un mien Jewenst aus utjelesnet Selwa.

²⁰Ekj waundel opp däm Stich de Jerajchtichkjeit, enne Medd opp de Stiej vom Rajcht;

²¹om dee, dee mie leewen, bestendjet Goot oawen to loten, un om äare Spikjasch too fellen.

²²De Har besaut mie aum Aunfank von sienem Wajch, ver siene Woakjen von jeehäa.

²³Ekj wia enjesat von Eewichkjeit häa, em Aunfank, ver de Uatiet de Ieed.

²⁴Ekj wia jebuaren, aus de Deepe (deepe Wota) noch nich wieren, aus noch kjeene Kjwalen wieren, rikj aun Wota.

²⁵Iea de Boajch ennjesenkjt worden, ver de Aunboaj wia ekj jebuaren;

²⁶aus hee de Ieed un de Stapen noch nich jemoakt haud, un däm Aunfank de Kjlieta (de Somm vom Stoff) vom Ieedkjreis.

²⁷Aus hee de Himmel fauststald, wia ekj doa, aus hee eenen Kjreiss aufmaut äwa daut Aunjesecht de Deepe (deepe Wota);

²⁸aus hee de Wolkjen bowen faust muak {Hi.35,5}, aus hee Faustichkjeit de Deepen Kjwalen gauf;

²⁹aus hee daut Mäa siene Jrensen sad, daut de Wota sienen Befäl nich äwaschräden, aus hee de Gruntloag de Ieed fauststald:

³⁰Doa wia ekj Schootkjind (Fläajlinkj, Woakjmeista) bie am, un wia Dach fa Dach siene Freid (Erjatsung), un späld ver am aulentiet,

³¹mie erjatsent opp däm bewontem Deel von siene Ieed; un miene Freid wia bie de Menschenkjinja.

³²Dan nu, jie Säns, hieet opp mie: Jlekjseelich sent, dee miene Wäaj bewoaren!

³³Hieet oppe Zucht un woat weis, un veschmiet dee nich!

³⁴Jlekjseelich de Mensch, dee opp mie hieet, endäm hee aun miene Däaren woakt Dach fa Dach, de Past von miene Dooasch bewoakt!

³⁵Dan wäa mie finjt, haft daut Läwen jefungen un Wooljefaulen erlangt vom Harn.

³⁶Oba wäa aun mie sindicht, deit siene Seel Jewault aun; aule, dee mie haussen, leewen däm Doot.