Read De Bibel JHF Spricha 9 Bible Online

Spricha 9 - De Bibel JHF bible

Spricha 9

¹De Weisheit haft äa Hus jebut, haft äare 7 Stendasch utjehakt;

²see haft äa Schlachtvee jeschlacht, äa Wien jemischt, uk äarem Desch jedakjt;

³see haft äare Deenstmejales utjeschekjt, entoloden oppe hechste Städen de Staut:

⁴«Wia es eenfeltich? Hee drei sikj hiahäa!» Too de Onvestendje sajcht see:

⁵«Komt, ät von mienem Broot, un drinkjt von däm Wien, däm ekj jemischt ha!

⁶Lot auf von de Eenfeltichkjeit un läft, un got omhäa opp däm Vestentniswajch!» -

⁷Wäa däm Spata trajchtwiest, holt sikj Schaund too; un wäa däm Gottloosen stroft, daut es sien Schaundflekj.

⁸Strof däm Spata nich, daut hee die nich haust; strof däm Weise, un hee woat die leewen.

⁹Jeff däm Weisen, soo woat hee noch weisa; belia däm Jerajchten, soo woat hee aun Kjantnis toonämen. -

¹⁰De Forcht Gottes es de Weisheit Aunfank; un de Erkjantnis vom Heiljen es Vestaunt.

¹¹Dan derch mie woaren diene Doag sikj vemieren, un Joaren vom Läwen woaren die tojedonen woaren.

¹²Wan du weis best, soo best du fa die weis; un spottst du, soo woascht du daut auleen droagen.

¹³Fru Noaheit es liedenschoftlich; see es blooss Eenfeltichkjeit un weet goa nuscht.

¹⁴Un see sett aum Engank von äarem Hus, opp eene Sett aun huach ligjende Städen de Staut,

¹⁵om entoloden, dee opp disem Wajch vebie gonen, dee äare Stiej jlikj hoolen:

¹⁶«Wäa es eenfeltich? Hee drei sikj hiahäa!» Un to däm Onvestendjen sajcht see:

¹⁷«Jestolne Wota sent seet, un heimlichet Broot es aunjenäm».

¹⁸Un hee weet nich, daut doa de Schautes {Ps.88,11} sent, enne deepe vom Scheol äare Enjelodne.