Read De Bibel JHF Liera 10 Bible Online

Liera 10 - De Bibel JHF bible

Liera 10

¹Doodje Flieejen moaken daut Eelj de Saulwmischa stinkjent un jäarend: Een bät Noaheit haft mea Jewicht aus Weisheit un Iea.

²Däm Weisen sien Hoat es no sienem Rajcht, un däm Noa sien Hoat no siene Linkje jerecht.

³Un wan uk de Noa opp däm Wajch waundat, fält am de Vestaunt, un hee sajcht aulem, daut hee een Noa es.

⁴Wan de Oaja vom Harscha jäajen die oppkjemt, soo velot diene Städ nich; dan ruich to sennen vehindat groote Sinden.

⁵Daut jeft een Iebel, daut ekj unjre Sonn jeseenen ha, aus een errtum, daut von däm Machthaba utjeit:

⁶De Noaheit woat en groote Iea enjesat, un Rikje setten Unjen (läajch).

⁷Ekj ha Kjnajchts opp Pieed jeseenen, un Ferschten, dee aus Kjnajchts too Fot jinjen.

⁸Wäa eene Kul groft, kaun nenn faulen; un wäa eene Mia ennrit däm kaun eene Schlang bieten.

⁹Wäa Steena brakjt, kaun sikj doaraun velazen; wäa Holt spoolt, kaun sikj doaderch en Jefoa brinjen.

¹⁰Wan daut Iesa stomp jeworden es, un hee haft de Schnied nich jeschläpe, soo mott hee siene Krauft mea aunstrenje; oba de Weisheit es väadeelhauft, om waut em Staund too saten.

¹¹Wan de Schlang bit, ea de Beschwäarung doa es, soo haft de Beschwäara kjeen Nutzen.

¹²De Wieed ut däm Mul vom Weisen sent Leeftol, oba de Leppen de Noaren veschlinjen am.

¹³De Aunfank de Wieed ut sienem Mul es Noaheit, un daut Enj siene Räd es schlemme Noaheit.

¹⁴De Noa moakt väl Wieed: Doch weet de Mensch nich, waut sennen woat; un waut no am sennen woat, wäa woat am daut toweeten loten?

¹⁵De Mieej de Noaren moakt am meed, am, wiels hee nich weet woo maun no de Staut jeit.

¹⁶Wee die, Launt, däm sien Kjennich een Jinjlinkj (Bochat) es, un däm siene Ferschten Zemorjes väl äten!

¹⁷Jlekjlich, du Launt, däm sien Kjennich een Sän von Adelje es, un däm siene Ferschten too rajchte Tiet äten, aus Mana un sikj nich Bedrinkjen!

¹⁸Derch Fulheit sinkjen de Baulkjes, un derch schlaupe Henj drepplt daut em Hus.

¹⁹Om sikj lostich too moaken, helt maun Moltieden, un Wien freit daut Läwen, un daut Jelt brinjt (erlaubt) aules.

²⁰Uk en diene Jedanken fluch nich däm Kjennich, un en diene Schlopstow fluch nich äwa däm Rikjen; dan de Väajel vom Himmel kjeene de Stemm wajchdroagen, un dee Flieejende daut Wuat malde.