Read De Bibel JHF Liera 4 Bible Online

Liera 4 - De Bibel JHF bible

Liera 4

¹Un wadamol sach ekj aul de Bedrekjunge, dee unja de Sonn passieren: Un kjikj, doa wieren Tronen de Bedrekjte, un see hauden kjeenen Treesta; un von de Haunt äare Bedrekja jinkj Jewault ut, un see hauden kjeenen Treesta.

²Doa lowd ekj de Doodes, dee lenjst jestorwen, mea aus de Läwendje, dee nu noch läwen;

³un jlekjlicha aus beid lowd ekj dän, dee noch nich jewast es, dee daut beese Doonen nich jeseenen haft, daut unjre Sonn es.

⁴Un ekj sach aule Mieej un Jeschaft enne Oabeit, daut et Aufgonst de eene jäajen de aundre es. Uk daut es Eitelkjeit un een utholen no Wint. -

⁵De Noa lajcht siene Henj toop un frat sien ieejnet Fleesch. -

⁶Bäta eene Haunt voll Ru, aus beid Fusten voll Mieej un utholen nom Wint.

⁷Un ekj dreid mie om un sach Eitelkjeit unjre Sonn:

⁸Doa es een eensja un kjeen tweeda, uk haft hee nich Sän noch Brooda, un aul siene Mieej haft kjeen Enj; siene Uagen woaren vom Rikjtum nich saut: «Doch fa wäm mieej ekj mie auf, un lot miene Seel Mangel lieden aum gooden?» Uk daut es Eitelkjeit un een ieblet Jeschaft.

⁹Twee sent bäta draun aus eena, wiels see eene goode Belooninj ha fa äare Mieej;

¹⁰dan wan see faulen, soo recht de eena sienen Frint opp. Oba wee däm eenen, dee doa fält, onen daut een tweeda doa es, om am opptorechten!

¹¹Uk wan 2 bie eenaunda ligjen, soo woaren see woam; oba de eena, woo woat hee woam woaren?

¹²Un wan wäa däm eenen jewaultich aunjript, soo woaren am de twee wadastonen; un eene 3-dobbelde Schnua veritt nich sooboolt.

¹³Bäta een oama un weisa Jinjlinkj aus een oola un onweisa Kjennich, dee nich mea weet, sikj woarnen to loten.

¹⁴Dan ut däm Jefangnen Hus kjeem hee rut, om Kjennich to sennen, wiels hee en janem Kjennichrikj oam jebuaren wia.

¹⁵Ekj sach aule Läwendje, dee unjre Sonn waundlen, met däm Jinjlinkj, däm tweeden, dee aun janem siene Städ stonen sull:

¹⁶Kjeen Enj fa aul daut Volkj, aul dee, dee hee fieed; dan noch woaren de Nokomende sikj äwa am nich freien. Dan uk daut es Eitelkjeit un een utholen nom Wint.