Read De Bibel JHF Liera 7 Bible Online

Liera 7 - De Bibel JHF bible

Liera 7

¹Bäta een gooda Nomen aus Saulweelj, un de Doodesdach aus de Dach, doa eena jebuaren woat.

²Bäta, en daut Trua Hus too gonen, aus en daut Fasthus too gonen, en däm jant daut Enj aula Menschen es; un de Läwendja nemt daut to Hoaten.

³Trua es bäta aus Lache; dan bie truajen Aunjesecht jeitet däm Hoat goot.

⁴Daut Hoat de Weise es em Truahus, un daut Hoat de Noaren em Hus de Freid.

⁵Bäta, daut schellen de Weise to hieren, aus daut eena däm Jesank de Noaren hieet.

⁶Dan aus daut Hachelstruck kjnistat unja däm Topp, soo daut Lache de Noaren. Uk daut es Eitelkjeit.

⁷Dan de Bedrekjung moakt däm Weisen onwellich, un daut Jeschenkj vedoaft daut Hoat.

⁸Bäta daut Enj von eene Sach aus äa Aunfank; bäta de Langmootja aus de Huachmootja.

⁹Sie nich schwind en dienem Jeist toom Oaja, dan de Oaja rut em Bossem de Noaren.

¹⁰Saj nich: Woo es daut, daut eenst de Doag bäta wieren aus dise? Dan nich ut Weisheit frajchst du doano.

¹¹Weisheit es goot aus een Oawgoot, un een Väadeel fa dee, dee de Sonn seenen.

¹²Dan em Schauten (Schutz) es, wäa Weisheit haft, em Schauten (Schutz), wäa Jelt haft; oba daut Väadeel de Erkjantnis es disa, daut de Weisheit äarem Ieejendeema Läwen jeft.

¹³Kjikj daut Woakj Gottes aun; dan wäa kaun jlikj moaken, waut hee kromm jemoakt haft?

¹⁴Aum jlekjlichen Dach sie gooda Dinj; oba aum Ojjlekjsdach bedenkj: Uk dise aus jane haft Gott jemoakt, doamet de Mensch nich utfinjt, waut no am passieren woat.

¹⁵Aulalei ha ekj jeseenen enne Doag miene Eitelkjeit: Doa es een Jerajchta, dee bie siene Jerajchtichkjeit omkjemt, un doa es een Gottloosa, dee bie siene Boosheit siene Doag velenjat.

¹⁶Sie nich aul too jerajcht, un wies die nich äwamässich weis: Wuarom west du die vedoawen?

¹⁷Sie nich aul too ojjerajcht, un sie kjeen Noa: Wuarom west du stoawen, ea diene Tiet doa es?

¹⁸Daut es goot, daut du aun disem faust helst, un uk von janem de Haunt nich trigjtrakjst; dan de Gottesferchtja es jäajen aul däm.

¹⁹De Weisheit moakt däm Weisen stoakja aus 10 Machthabende, dee enne Staut sent.

²⁰Dan unjre Menschen es kjeen Jerajchta oppe Ieed, dee Goodet deit un nich sindicht.

²¹Uk recht dien Hoat nich opp aule Wieed, dee maun räd, doamet du nich dienem Kjnajcht, äwa die fluchen hieescht;

²²dan uk väl Mol, dien Hoat weet daut, hast uk du aundre jeflucht.

²³Dit aules ha ekj met Weisheit jeprooft. Ekj säd: Ekj well weis woaren; oba see bleef wiet auf von mie.

²⁴Wiet auf es daut, waut es, un deep, deep: Wäa kaun daut errieekjen?

²⁵Ekj dreid mie rom, un mien Hoat jinkj doaropp ut Weisheit un een rechtjet Uadeel too erkjanen un to erfoaren un to sieekjen, un to erkjanen, daut de Gottloosichkjeit Noaheit es, un de Noaheit Wonsenn.

²⁶Un ekj funk, waut betta aus de Doot es: Dee Fru, dee aus een Nat es, un dee äa Hoat eene Schlenj, dee äare Henj Spaunsel sent. Wäa Gott wooljefaulich es, woat ar entranen; oba de Sinda woat derch ar jefangen woaren.

²⁷Kjikj, dit ha ekj jefungen, sajcht de Liera, endäm ekj eent nom aundren doo, om een rechtjet Uadeel too finjen:

²⁸Waut miene Seel emma wada jesocht un ekj nich jefungen ha, es dit: Eenen Maun ut 1000-de ha ekj jefungen, oba eene Fru unja dise aule ha ekj nich jefungen.

²⁹Auleen, kjikj, dit ha ekj jefungen, daut Gott däm Mensch opprechtich jeschaufen haft; oba see ha väl Konst jesocht.