Read De Bibel JHF Leet de Leeda 1 Bible Online

Leet de Leeda 1 - De Bibel JHF bible

Leet de Leeda 1

¹Daut Leet de Leeda, von Salomo.

²Hee saul mie kussen met däm Kuss met sienem Mul, dan diene Leew es bäta aus Wien.

³Leeftol aun Jeroch sent diene Saulwen, een utjegotnet Saulweelj es dien Nomen; doarom leewen die de Junkfrues.

⁴Trakj mie: Wie woaren die hinjaraun ranen. De Kjennich haft mie en siene Bennastowen jefieet: Wie wellen jublen un wie wellen ons en die freien, wie wellen diene Leew lowen mea aus Wien! Dee leewen die opprechtich.

⁵Ekj sie schwoat, oba leeftolich, Dajchta Jerusalems, aus de Zelten Kedar {Hes.27,21}, aus de Zeltdakjen Salomo.

⁶Kjikjt mie nich aun, wiels ekj dunkel sie, wiels de Sonn mie vebrent haft; de Säns miene Mutta oajaden sikj äwa mie, see saden mie aus Wajchta de Wiengoades; mienen ieejnen Wiengoaden ha ekj nich bewoakt.

⁷Saj mie, du, däm miene Seel leeft, wua weidst du, wua latst du aum Meddach loagren? Dan wuarom saul ekj aus eene Veschleiade sennen bie de Häaden diene Frind?

⁸Wan du daut nich weetst, du Baste unjre Frues, soo go rut, de Spuare vonne Häaden no un weid diene Lama bie de Hoads äare Woninj.

⁹Eenem Pieet aun däm Woagen Farao vejlikj ekj die, miene Frindin.

¹⁰Leeftolich sent diene Baken enne Kjäden (rundliche Scheenheite, dee no beid Sieden vonne Koppbenj raufhenjen), dien Hauls enne Parlschnooa.

¹¹Wie wellen die goldne Kjäden moaken met Kugle von Selwa.

¹²Aus de Kjennich aun siene Tofel (aum Desch) wia, jeef miene Narde äaren Duft.

¹³Mien Jeleewda es mie een Bunt Murren, daut tweschen miene Brosten rut.

¹⁴Eene Zupresdruw es mie mien Jeleewda, enne Wiengoades von Engedi.

¹⁵Kjikj, du best scheen, miene Frindin, kjikj, du best scheen, diene Uagen sent aus Duwen.

¹⁶Kjikj, du best scheen, mien Jeleewda, jo, leeftolich; jo, ons Loaga es freschet Jreens.

¹⁷De Baulkjes von onse Hiesa sent Zeeda, Ziepressen onse Dackspoare.