Read De Bibel JHF Leet de Leeda 3 Bible Online

Leet de Leeda 3 - De Bibel JHF bible

Leet de Leeda 3

¹Opp mienem Loaga de Nacht socht ekj, däm miene Seel leeft: Ekj socht am un funk am nich.

²Ekj well doch oppstonen un enne Staut omhäa gonen, oppe Gaussen un oppe Plauz, well sieekjen, däm miene Seel leeft. Ekj socht am un funk am nich.

³Daut fungen mie de Wajchtasch, dee enne Staut omhäa gonen: Ha jie däm jeseenen, däm miene Seel leeft?

⁴Afens wia ekj aun an vebie, doa funk ekj, däm miene Seel leeft. Ekj hilt am faust un leet am nich loos, bat ekj am jebrocht haud en daut Hus miene Mutta un enne Schlopstow - dee mie jebuaren haft.

⁵Ekj beschwia junt, Dajchta Jerusalem, bie de wille Kose ooda bie de Herschkjäj vom Flekj, daut jie nich wakje noch oppwakjen de Leew, bat daut äa jefelt!

⁶Wäa es dee, dee doa von de Wieste raufkjemt aus een Ruakstenda, derchdrenjt von Mirren un Weiruak, von aulahaunt Jewerzen de Saulwmischa?

⁷Kjikj doa, Salomo sien Bad: 60 Helden runtom daut selje häa von de Helden Israels.

⁸See aula fieren daut Schwieet, sent jeeeft em Kaumf; een jiedra haft sien Schwieet aun siene Hoft, toom Schutz ver däm Schrakj enne Nacht.

⁹De Kjennich Salomo haft sikj een Prachtbad jemoakt von Holt vom Libanon.

¹⁰Siene Stendasch haft hee ut Selwa jemoakt, siene Län von Golt, siene Sett von Purpur; daut Bennaschte es konstvoll utjeneit, ut Leew, von de Dajchta Jerusalem.

¹¹Komt rut, Dajchta Zion, un bekjikjt däm Kjennich Salomo met de (enne) Kroon, met dee siene Mutta am jekjreent haft aum Dach siene Kjast un aum Dach de Freid en sienem Hoaten!