Read De Bibel JHF Leet de Leeda 4 Bible Online

Leet de Leeda 4 - De Bibel JHF bible

Leet de Leeda 4

¹Kjikj, du best scheen, miene Frindin, kjikj, du best scheen: Diene Uagen sent Duwen unja eenem Schleia. Dien Hoa es aus eene Häad Kose, dee aun däm Aunboaj de Jebirje Gilead loagren.

²Diene Tänen sent aus eene Häad jeschoane Schop, dee vom schwamen nohecht komen, dee aultomol Poakjes jebäaren, un kjeent unja an es onfruchtboa.

³Diene Leppen sent aus eene Schnua von Karmesin, un dien Mul es leeftolich. Aus eene Schnäd von eenen Granataupel es dien Schlop unja dienem Schleia.

⁴Dien Hauls es aus David sien Torm, dee rund jebut es: 1000 Schilda henjen doaraun, aule Schilda de Helden.

⁵Diene beid Brosten sent aus een Poakje junge Kose, dee unjre Lelje weiden.

⁶Bat de Dach aufkjeelt un de Schautes veschwinjen, well ekj nom Mirenboajch hangonen un nom Aunboaj met Weiruak.

⁷Gaunz scheen best du, miene Frindin, un kjeen Fäla es aun die.

⁸Met mie vom Libanon rauf, miene Brut, met mie vom Libanon saust du komen; vonne Spetz det Amana rauf saust du kjikjen, vonne Spetz de Senir un Hermon, von de Loagastäd de Leiws, von de Boaj de Leoparde.

⁹Du hast mie daut Hoat jestolen, miene Sesta, miene Brut; du hast mie daut Hoat jestolen met dienem eenem Blekj, met eene Kjäd von dienem Haulsschmuck.

¹⁰Woo scheen es diene Leew, miene Sesta, miene Brut; wooväl bäta es diene Leew aus Wien, un de Duft von diene Saulw aus aule Jewerzen!

¹¹Honnich rant von diene Leppen, miene Brut; Honnich un Malkj es unja diene Tung, un de Duft von diene Kjleeda aus de Duft vom Libanon.

¹²Een veschlotna Goaden es miene Sesta, miene Brut, een veschlotna Borm, eene vesäajelde Kjwal.

¹³Waut ut die waust, es een Lostgoaden von Granatbeem met adelje Frucht, Hannabloomen (Granautappelboom) met Narde;

¹⁴Narde un Safran, Jewerzholt un Zimt, met aulahaunt Weiruakholt, Mirren un Aloe met vetrafliche Jewerzen;

¹⁵eene Goadenkjwal, een Borm met läwendjem Wota, un Streem, dee vom Libanon ranen.

¹⁶Woak opp, Nuadwint, un komm, Siedwint: Pust derch mienem Goaden, lot sien scheenet Jeroch ranen! Mien Jeleewda komm en sien Goaden un at dee am kjestliche Frucht.