Read De Bibel JHF Leet de Leeda 8 Bible Online

Leet de Leeda 8 - De Bibel JHF bible

Leet de Leeda 8

¹Oo, wieescht du mie aus een Brooda, dee de Brosten miene Mutta jesoagen! Wan ekj die buten jefungen haud, ekj wull die kussen; un maun wudd mie nich veachten.

²Ekj wudd die fieren, die nennbrinjen en daut Hus miene Mutta, du wurscht mie belieren; ekj wudd die drenkjen met Jewerzwien, met däm Sauft von miene Grenautapel.

³Siene Linkje es unja mienem Haupt, un siene Rajchte omfot mie.

⁴Ekj beschwia junt, Dajchta Jerusalem, daut jie nich wakje noch oppwakjen de Leew, bat daut äa jefelt!

⁵Wäa es dee, dee doa rauf kjemt von de Wieste häa, sikj länt opp äarem Jeleewden? Unjrem Aupelboom ha ekj die jewakjt. Doa haft diene Mutta met die Wee jehaut, doa haft Wee jehaut, dee die jebuaren.

⁶Laj mie aus een Säajelrinkj aun dien Hoat, aus eenen Säajelrinkj aun dienen Oarm! Dan de Leew es jewaultsom aus de Doot, hoat aus de Scheol äa Iewa; äare Gluaje sent Fiaglooje, eene Flaum Jahs.

⁷Groote Wota Vemäajen nich de Leew uttolaschen, un Streem äwaschwamen ar nich. Wan een Maun aulet Rikjtum ut sienem Hus om de Leew jäwen wull, maun wudd am blooss veachten.

⁸Wie haben eene Sesta, eene kjliene, dee noch kjeene Brosten haft; waut sell wie met onse Sesta doonen aun däm Dach, doa maun om äa woawen woat?

⁹Wan see eene Mia es, soo well wie eene Kroon von Selwa doabowen buen; un wan see eene Däa es, soo well wie ar met eenem Zeedabrat veschluten.

¹⁰Ekj sie eene Mia, un miene Brosten sent aus Torms; doa wort ekj en siene Uagen aus eene, dee Fräd finjt.

¹¹Salomo haud eenen Wienboajch bie Baal-Hamon; hee äwajeef däm Wienboajch de Wajchtasch: Een jiedra sull fa siene Frucht 1000 Selwaschekel brinjen.

¹²Mien ieejna Wienboajch es ver mie; dee 1000 sent diene, Salomo, un 200 sent däm Wajchta siene Frucht.

¹³Bewonarin de Goades, de Frind horchen opp diene Stemm; lot mie dee hieren!

¹⁴Ran, mien Jeleewda, un sie aus eene Kos ooda een junga Hersch oppe Balsamboaj!