Read De Bibel JHF Jesaja 1 Bible Online

Jesaja 1 - De Bibel JHF bible

Jesaja 1

¹Daut Jesecht (eene Vision) waut Jesaja, däm Sän Amoz, daut hee äwa Juda un Jerusalem jeseenen haud en de Doag Usija, Jotam, Ahas, Hiskia, dee Kjennichs von Juda.

²Hieet, jie Himmel, un hia opp, du Ieed! Dan de Har haft jerät: Ekj ha Kjinja groot jemoakt, un oppjetrocken, un see sent von mie aufjefollen.

³Een Oss kjant sienen Ieejendeema, un een Äsel de Kjrebb von sienem Harn; Israel haft kjeene Erkjantnis, mien Volkj haft kjeen Vestentnis.

⁴Wee de sindjen Nazion, däm Volkj, belaust met Ojjerajchtichkjeit, däm Somen de Iebel doonende, dän vedoawlich haundelnde Kjinja! See ha däm Harn veloten, ha däm Heiljen Israel vespott, sent trigj jegonen.

⁵Wuarom sell jie wada jeschloagen woaren, doa jie blooss däm Auffaul vemieren wudden? Daut gaunze Haupt es krank, un daut gaunze Hoat es meed.

⁶Von de Footsole bat däm Haupt es nuscht Jesundet aun am: Wunden un Strime un fresche Schläaj; see sent nich utjedrekjt un nich vebungen, un nich met Eelj oppjewäkjt worden.

⁷Jun Launt es eene Wieste, june Städa sent met Fia vebrent; june Aka, - Framde vetäaren dee ver june Uagen; un eene Wieste es daut, aus too Grunt jebrocht derch Framde.

⁸Un de Dochta Zion es äwajebläwen aus eene Bood em Wienboajch, aus eene Nachtbood em Gurkjefeld, aus eene beloagade Staut.

⁹Wan Gott de Häaschoa ons nich eenen gaunz kjlienen Äwabliefsel jeloten haud, aus Sodom wäa wie, aus Gomorra jeworden.

¹⁰Hieet daut Wuat Gottes, Väastona von Sodom; horcht opp onsem Gott sien Jesaz, Volkj von Gomorra!

¹¹Waut saul mie de Menj june Schlachtopfa? Sajcht de Har; ekj sie saut von de Brauntopfa von Schopsbakj un daut Fat de jemaste Kjalwa, un aum Bloot von Bolles un Lama un junge Bakj ha ekj kjeen Jefaulen.

¹²Wan jie komen, om ver mienem Aunjesecht too erschienen, wäa haft dit von june Haunt jefoddat, miene Väahäw too veklunjen?

¹³Brinjt kjeene faulsche Opfagow mea! Rieekjastoff (Weiruak, seeta Ruak) es mie een Aufschu. Niemon un Sabat, daut toop roopen von Vesaumlungen: Fräfel un Fastvesaumlung kaun ekj nich vedroagen.

¹⁴June Niemonen un june Fasttieden haust miene Seel; see sent mie too Laust jeworden, ekj sie meed dee too droagen.

¹⁵Un wan jie june Henj utbreeden, vestäakj ekj miene Uagen ver junt; selfst wan jie mea Bäden, hia ekj nich: June Henj sent voll Bloot.

¹⁶Wauscht, reinicht junt; schauft de Schlajchtichkjeit von june Haundlungen ut miene Uagen, lot auf vom Iebel doonen!

¹⁷Lieet goodet too doonen, tracht no Rajcht, leid däm Bedrekjten; schauft Rajcht de Weis, fieet de Sach de Wätfrues!

¹⁸Dan komt un lot ons metenaunda rechten, sajcht de Har. Wan june Sinden aus Scharlach sent, see sellen Schneewitt woaren; wan see root aus Purpur sent, aus Woll sellen see woaren.

¹⁹Wan jie wellich sent un hieren, soo sell jie daut Goode vom Launt äten.

²⁰Oba wan jie junt wäaren un wadaspanstich sent, soo sell jie vom Schwieet jefräten woaren. Dan daut Mul Gottes haft jerät.

²¹Woo es de true Staut to eene Hua jeworden! See wia voll Rajcht, Jerajchtichkjeit wond doabennen, un nu Merda!

²²Dien Selwa es too Ausch jeworden, dien iedla Wien met Wota vemischt.

²³Diene Ferschten sent Wadaspanstje un Deewfrind (Stäla-Frind), een jiedra von an leeft Jeschenkja un jajcht no Belooninj; de Weis schaufen see nich Rajcht, un de Wätfrues äare Sach kjemt nich ver an.

²⁴Doarom sajcht de Har, Gott de Häaschoa, de Majchtja Israels: Wee! Ekj woa mie aun miene Jäajna treesten un Rach eewen aun miene Fiend.

²⁵Un ekj woa miene Haunt jäajen die dreien, un woa dien Ausch utschmelte aus met Luagsolt un aul dien Blie wajchschaufen.

²⁶Un ekj woa diene Rechta wada häastalen aus too oola Tieden, un diene Rotjäwa aus aum Aunfank. Doano woat maun die nanen: Staut de Jerajchtichkjeit, true Staut.

²⁷Zion woat derch Jerecht erleest woaren, un siene Tridjjekomne derch Jerajchtichkjeit.

²⁸Oba de Äwaträda un Sinda aula toop Veschmatre; un dee däm Harn veloten, woaren unjagonen.

²⁹Dan see woaren beschämt woaren wäajen de Terebinten, aun dee jie Lost ha, un jie woaren met Schaund bedakjt woaren wäajen de Goades, aun de jie jefaulen hauden.

³⁰Dan jie woaren aus eene Terebinten sennen, dee äare Bläda vewalkjt sent, un aus een Goaden, dee kjeen Wota haft.

³¹Un de Stoakja woat to Brenninj woaren un sien doonen too Fiafunk; un see woaren beid metenaunda vebrennen, un kjeena woat laschen.