Read De Bibel JHF Jesaja 11 Bible Online

Jesaja 11 - De Bibel JHF bible

Jesaja 11

¹Un een Auflaja woat ut däm Boomstobben Isai väakomen, un een Aust ut siene Wartel woat Frucht brinjen.

²Un opp am woat de Jeist Gottes ruen, de Jeist de Woarheit un daut Vestentnis, de Rotjeist un de Krauft, de Jeist de Erkjantnis un Forcht Gottes;

³un sien Wooljefaulen woat sennen aun de Forcht Gottes. Un hee woat nich nom seenen von siene Uagen rechten, un nich Rajcht spräakjen nom Hieren von siene Uaren;

⁴un hee woat de Jerinje en Jerajchtichkjeit rechten, un däm Deemootjen em Launt en Jerajchtichkjeit Rajcht spräakjen. Un hee woat de Ieed met de Wäd ut sienem Mul schlonen, un met däm Odem siene Leppen däm Gottloosen dootmoaken.

⁵Un Jerajchtichkjeit woat de Jirtel von siene Lenden sennen, un de Tru de Jirtel om siene Hoften sennen.

⁶Un de Wulf woat biem Laum weiden, un de Leopard bie däm kjlienen Bock ligjen; un daut Kaulf un de junga Leiw un daut Mastfee woaren toop sennen, un een kjliena Jung woat an joagen.

⁷De Koo un Boa woaren metenaunda weiden, äare Junge ligjen toop; un de Leiw woat Stroo fräten aus daut Rind.

⁸Un daut Brostkjint woat aun däm Natta Loch spälen, un daut aufjewande Kjint siene Haunt utstrakjen no de Heel de Jeftschlang.

⁹Maun woat nich Iebel doonen, noch vedorwen haundlen opp mienem gaunzen heiljen Boajch; dan de Ieed woat voll de Erkjantnis Gottes sennen, soo aus daut Wota däm Mäaresgrunt bedakjen.

¹⁰Un daut woat passieren aun janem Dach: De Wartelauflaja Isai, dee doa steit aus een Tieekjen fa de Velkja, no am woaren de Nazionen froagen; un siene Rustäd woat Harlichkjeit sennen.

¹¹Un daut woat passieren aun janem Dach, doa woat de Har noch toom tweeden Mol siene Haunt utstrakjen, om de Äwajebläwne von sienem Volkj, dee äwabliewen woat, loostokjeepen ut Assur un ut Ägipten un ut Patros un ut Ätiopien un ut Elam un ut Sinear un ut Hamat un ut de Mäaresinsle.

¹²Un hee woat fa de Nazionen een Tieekjen opphäwen un de Veschlapte Israels toopbrinjen, un de Vestreide Juda woat hee saumlen von de 4 Enj de Ieed.

¹³Un de Aufgonst Efraims woat veschwinjen, un de Bedrenja Juda woaren utjerot woaren; Efraim woat Juda nich beneiden, un Juda woat Efraim nich bedrenjen.

¹⁴Un see woaren de Filista oppe Schulren flieejen - jäajen Wasten, woaren metenaunda de Säns - vom Oosten plindre; aun Edom un Moab woaren see äare Haunt lajen, un de Kjinja Amon woaren an horchen.

¹⁵Un de Har woat de Mäarestung Ägiptens vebaunen; un hee woat siene Haunt äwa däm Stroom hoolen met de Gloot von sienem Frodem, un an en 7 Riee veschlonen un moaken, daut maun met Schoo doa derch jeit.

¹⁶Un soo woat eene Gauss sennen von Assur häa fa de Äwajebläwne ut sienem Volkj, dee äwabliewen woat, aus eene Gauss fa Israel wia aun janem Dach, doa aus see ut däm Launt Ägipten nopptrocken.