Read De Bibel JHF Jesaja 19 Bible Online

Jesaja 19 - De Bibel JHF bible

Jesaja 19

¹Utspruch äwa Ägipten. Kjikj, de Har foat opp eene schwind ranende Wolkj un kjemt no Ägipten. Un de Jetzen en Ägipten bäben ver am, un daut Hoat Ägiptens veschmelt en sienem Ennalichen.

²Un ekj well Ägipten reizen jäajen Ägipten; un see woaren strieden, een jiedra jäajen sienen Brooda un een jiedra jäajen sienen Näakjsten, Staut jäajen Staut, Kjennichrikj jäajen Kjennichrikj.

³Un Ägiptens Jeist woat vegonen en sienem Ennalichen, un ekj well sien Rot tonicht moaken: Un see woaren de Jetta un de Beschwäara un de Zaubra un de Woasaja befroagen.

⁴Un ekj well de Ägipta äwajäwen enne Haunt von eenem hoaden Harn; un een grausoma Kjennich woat äwa an harschen, sajcht de Har, Gott de Häaschoa.

⁵Un de Mäareswota woaren sikj senkje, un de Stroom woat veranen un utdräjen.

⁶Un Streem woaren stinkjen; de Flusse Ägiptens nämen auf un drieeje ut, Rua un Schelp vewalkje.

⁷De Felda aum Nil, aum Eewa vom Nil, un jiedret Sotfeld aum Nil vedrieecht, woat vom Wint vedrieejen un es nich mea.

⁸Un de Fescha kloagen, un daut truaren aula, dee de Angel en däm Nil schmieten; un dee daut Nat opp däm Wotaspieejel utbreeden, stonen truarich doa.

⁹Un beschämt sent de Flauss Oabeida un de Wäwa von Boomwoll wäwen.

¹⁰Un siene Gruntfeilasch sent veschloagen; aule, dee fa Loon oabeiden, sent seelisch betriept.

¹¹Iedle Noaren sent de Ferschten von Zoan, de weis Rotjäwa vom Farao; äa Rotschluss es domm jeworden. Woo saj jie toom Farao: «Ekj sie een Sän de Weise, een Sän von oole Kjennichs?»

¹²Woa sent see dan, diene Weise? Muchten see die doch vekjindjen un erkjanen, waut Gott de Häaschoa äwa Ägipten beschloten haft.

¹³De Ferschten von Zoan sent Noaren un de Ferschten von Nof [Memfis] sent bedroagt jeworden; daut ha Ägipten erren jefieet de Heipta von siene Stam.

¹⁴De Har haft en sienem Ennalichen eenen Schwindel Jeist utjegoten, daut see Ägipten erren jefieet ha en aul sienem Doonen, aus een Bedrunkna stolpat en sienem Kolkj.

¹⁵Un von Ägipten woat kjeene Dot utgonen, dee Haupt ooda Zoagel, Palmaust ooda Bambuse moaken woat.

¹⁶Aun janem Dach woaren de Ägipta aus Frues sennen; un see woaren zetren un bäben ver däm opphäwen de Haunt Gottes de Häaschoa, dee hee jäajen an opphäwen woat.

¹⁷Un daut Launt Juda woat fa Ägipten toom Schrakj sennen. Soo foaken aus daut irjent wäa bie de Ägipta erwänt, woaren see bäben wäajen däm Rotschluss Gottes de Häaschoa, däm hee äwa an beschloten haft.

¹⁸Aun janem Dach woaren 5 Städa em Ägiptenlaunt sennen, dee de Sproak Kanaan räden un bie Gott de Häaschoa schwieren woaren. Eene woat de Staut Ir-Heres heeten.

¹⁹Aun janem Dach woat enne Medd vom Launt Ägipten een Aultoa däm Harn jeweit sennen, un een Denkjmol dicht aun siene Jrens däm Harn;

²⁰un daut woat to eenem Tieekjen un to eenem Zeichnis sennen däm Gott de Häaschoa em Launt Ägipten. Dan see woaren toom Harn schrieen wäajen de Bedrekja, un hee woat an eenen Rada un Kjamfa schekjen un an raden.

²¹Un de Har woat sikj dän Ägipta too erkjanen jäwen, un de Ägipta woaren däm Harn aun jane Doag erkjanen; un see woaren deenen met Schlachtopfa un Speisopfa, un woaren Gott däm Harn een Vespräakjen doonen un betolen.

²²Un de Har woat de Ägipta schlonen, schlonen un heelen; un see woaren sikj nom Harn dreien, un hee woat sikj von an erbedde loten un an heelen.

²³Aun janem Dach woat eene Gauss sennen von Ägipten no Assur; un de Assura woaren no Ägipten un de Ägipta no Assur komen, un de Ägipta woaren met däm Assura Gott deenen.

²⁴Aun janem Dach woat Israel daut dredde met Ägipten un met Assur sennen, een Säajen enne Medd de Ieed;

²⁵dan Gott de Häaschoa säajent daut un sajcht: Jesäajent es mien Volkj Ägipten, un Assur, daut Woakj miene Henj, un Israel, mien Oawgoot!