Read De Bibel JHF Jesaja 20 Bible Online

Jesaja 20 - De Bibel JHF bible

Jesaja 20

¹En däm Joa, doa de Tartan no Aschdod kaum, aus Sargon, de Kjennich von Assur, am jeschekjt haud, un hee jäajen Aschdod street un daut enneem:

²En dise Tiet räd de Har derch Jesaja, däm Sän Amoz, un säd: Go un lees daut Sakduak von diene Lenden un trakj diene Schoo von diene Feet ut. Un hee deed aulsoo, jinkj noaktich un boaft.

³Un de Har säd: Soo aus mien Kjnajcht Jesaja noaktich un boaft jegonen es, dree Joa lank - een Tieekjen un Väabilt betrafs Ägipten un betrafs Ätiopien:

⁴Aulsoo woat de Kjennich von Assur de Jefangne von Ägipten un de Wajchjefieede von Ätiopien wajchjoagen, Jinjlinje un Jreisen, noaktich un boaft un met ne noaktje Sett, too eene Schaund fa Ägipten.

⁵Un see woaren sikj vefieren un beschämt sennen wäajen Ätiopien, äa Velot, un wäajen Ägipten, äa Riem.

⁶Un de Bewona von disem Eewalaunt (Palestina) woaren aun janem Dach sajen: Kjikj, aulsoo es daut met onsem Velot, wuahan wie om Help randen, om von däm Kjennich von Assur jerat to woaren! Un woo sell wie wajchranen?