Read De Bibel JHF Jesaja 23 Bible Online

Jesaja 23 - De Bibel JHF bible

Jesaja 23

¹Utspruch äwa Tierus. Hielt, jie Schäp von Tarsis! Dan see es vewust, onen Hus, onen dee doa nengonen. Vom Launt de Kittäa häa es an daut toweeten loten.

²Siet stell, jie Bewona de Insel! Sidonische Jeschaftslied, dee daut Mäa befoaren, felden die;

³un opp grootem Wota wia de Sot von Sichor, de Arnt vom Nil äa Ennkomen; un see wäa de Moakjtplauz de Nazionen.

⁴Sie beschämt, Sidon! Dan daut Mäa räd, de Mäaresfastinj (eene vesechade Staut em Mäa) , un sajcht: Ekj ha kjeene Wee jehaut un nich jebuaren, un kjeene Jinjlinje grootjetrocken, noch Junkfrues oppjetrocken.

⁵Sooboolt de Norecht no Ägipten kjemt, woaren see zetren bie de Norecht von Tierus.

⁶Foat äwa no Tarsis; hielt, jie Bewona de Insel!

⁷Es daut june frooe Staut, dee äa Aunfank ut de Uaoole Tieden es, dee äare Feet droagen, om en de wiede Lenda sikj auntosiedlen?

⁸Wäa haft soowaut äwa Tierus beschloten, dee de Kroonen vedeelt, dee äare Haundelslied Ferschten, dee äare Hendla de Väanämen de Ieed wieren?

⁹Gott de Häaschoa haft daut beschloten, om dän Stolt un jiedre Pracht too Schaund tomoaken, om veachtlich too moaken aule Väanämen de Ieed.

¹⁰Äwaschwam dien Launt aus de Nil, Dochta Tarsis! Daut jeft kjeenen Jirtel mea.

¹¹Hee haft siene Haunt äwa daut Mäa utjestrakjt, haft Kjennichrikjs en Bäben vesat; de Har haft äwa Kanaan jeboden, siene Fastinj entwei to moaken.

¹²Un hee säd: Du saust nich mea froo sennen, du meshaundelde Junkfru, Dochta Sidon! Moak die opp no Kittim, foa äwa! Uk doa woat die kjeene Ru woaren.

¹³Kjikj, daut Launt de Chaldäa, dit Volkj, daut nich wia (Assur haft daut de Bewona de Wieste faustjesat), recht siene beloagrungs Torms opp, de Paulausten riet dol, moakt daut to eenem Trimmahupe.

¹⁴Hielt, jie Tarsis Schäp! Dan june Fastinj es vewust.

¹⁵Un daut woat passieren aun janem Dach, doa woat Tierus 70 Joa vejäten woaren, aus de Doag von eenem Kjennich. Aum Enj von 70 Joa woat daut Tierus gonen, nodäm Leet von de Hua:

¹⁶«Näm de Hop, go omhäa enne Staut, du vejätne Hoa! Späl, soo goot du kaust, sinj Leet opp Leet, daut maun wada aun die denkjt».

¹⁷Dan daut woat passieren aum Enj von 70 Joa, doa woat de Har Tierus strofen; un see woat wada too äarem Huarenloon komen, un woat Huararie driewen met aule Kjennichrikjs de Ieed opp däm gaunzen Ieedboddem.

¹⁸Un äa Jewenst un äa Huarenloon woat däm Harn heilich sennen; hee woat nich aunjesaumelt un nich oppbewoat woaren; sonda äa Jewenst woat fa dee sennen, dee ver däm Harn wonen, doamet see äten bat see saut sent un prachtvoll jekjleet sent.