Read De Bibel JHF Jesaja 24 Bible Online

Jesaja 24 - De Bibel JHF bible

Jesaja 24

¹Kjikj, de Har moakt daut Launt ladich un drieecht daut ut; un hee dreit siene Bowaschicht om un vestreit siene Bewona.

²Un aus däm Volkj, soo jeit daut däm Priesta; aus däm Kjnajcht, soo sienem Harn; aus de Deenstmejal, soo äare Jebeedarin; aus däm dee doa kjaft, soo däm Vekjeepa; aus däm dee doa liet, soo däm dee utliet; aus däm Schildna, soo sienem Monenden.

³Daut Launt woat gaunz ladich un jeplindat; dan Gott haft dit Wuat jerät.

⁴Daut truat, daut Launt walkjt; daut schmacht, de Ieedkjreis walkjt han; daut schmachten de Hechten vom Volkj em Launt han.

⁵Un de Ieed es unja äare Bewona entheilicht jeworden; dan see ha de Jesazen äwaträden, de Jebooten äwaschräden, däm eewjen Bunt jebroaken.

⁶Doarom haft de Fluch de Ieed jefräten, un äare Bewona woaren jestroft; doarom sent de Ieedbewona vebrent, un weinich Menschen bliewen äwa.

⁷Daut truat de junga Wien, daut veschmacht de Wienstock; daut seften aula, dee von Hoaten froo wieren;

⁸de Freid de Trompeeten es vebie, oppjehieet haft daut frooe Jeschrecht, de Freid de Hoap rut;

⁹maun drinkjt kjeenen Wien mea unja Jesank, betta schmakjt daut stoakje Jedrenkj dän, dee daut drinkjen.

¹⁰Vewiest es de ladje Staut, veschloten jiedret Hus, soo daut kjeena nengonen kaun.

¹¹Kloag Jeschrecht om däm Wien es opp de Gaussen; unjajegonen es aule Freid, wajchjegonen es de Freid von de Ieed.

¹²Von de Staut es blooss eene Wieste äwajebläwen, un en Trimma woaren de Dooasch veschloagen.

¹³Dan soo woat daut enne Medd de Ieed passieren, en de Medd de Velkja: Aus biem Eeljbäaren aufschlonen, aus biem noläsen, wan de Wienarnte too Enj es.

¹⁴Jane (de Entkomne ut de Vestreiung Israels) woaren äare Stemm opphäwen, woaren jublen. Äwa de Majestät Gottes jublen see vom Mäa.

¹⁵Doarom jeft däm Harn Iea em Oosten, opp de Inslen em Mäa däm Nomen Gottes, däm Gott Israels!

¹⁶Wie hieren von de Enj de Ieed Jesank: «Harlichkjeit däm Jerajchten!» Doa säd ekj: Ekj vego, ekj vego, wee mie! Reibasch roowen, un reibarisch roowen de Reibasch an.

¹⁷Schrakj un Kul un Strank komen äwa die, Bewona de Ieed!

¹⁸Un daut passieed, wäa ver de grulje Stemm rant, felt enne Kul; un wäa ut de Kul nohecht sticht, woat em Strank jefangen. Dan de Fensta en de Hechten doonen sikj op, un daut häwen sikj de Gruntfausten de Ieed opp.

¹⁹De Ieed brakjt utenaunda, de Ieed vebrakjt, de Ieed wankt han un häa;

²⁰de Ieed stolpat (tomelt, schwankt) aus een Bedrunkna un schokelt aus een Henjbad; un äare Äwaträdunk licht schwoa opp ar: Un see felt un steit nich wada opp.

²¹Un daut woat passieren aun janem Dach, doa woat de Har strofen de bowaschten Harscha de Hechten, un Kjennichs de Ieed oppe Ieed.

²²Un see woaren en de Kul enjeschloten, aus maun Jefangne ennspoat, un em Jefenkjnis enjeschloten; un no väle Doag woaren see bestroft woaren.

²³Un de Mon woat met Schaund bedakjt un de Sonn beschämt woaren; dan Gott de Häaschoa harscht aus Kjennich opp däm Boajch Zion un en Jerusalem, un ver sienem Eltestasch es Harlichkjeit.