Read De Bibel JHF Jesaja 25 Bible Online

Jesaja 25 - De Bibel JHF bible

Jesaja 25

¹Har, du best mien Gott; ekj well die erhäwen, dien Nomen well ekj lowen; dan du hast Wunda jewirkjt, Rotschluss vom wieden, Tru un Woarheit.

²Dan du hast ut eene Staut eenen Steenhupen jemoakt, de fauste Staut to eenem Trimmahupe, däm Paulaust de Framde, daut hee kjeene Staut mea es: Hee woat en Eewichkjeit nich oppjebut woaren.

³Doarom woat die een trotzjet Volkj ieren, Städa Jewault doonende Nazionen woaren die ferchten.

⁴Dan du best däm Oamen eene Fastinj jewast, eene Fastinj däm Oamen en siene Bedrenkjnis, eene Tooflucht ver däm Räajenstorm, een Schauten ver de Hett; dan daut Schnuwe de Jewault doonende wia aus een Räajenstorm jäajen de Mia.

⁵Aus de Hett en eenem drieejen Launt, buagst du daut Toobe de Framde; aus de Hett derch eenem Schauten de Wolkjen, wort de Jewault doonende äa Jubeljesang jelajcht (leisa).

⁶Un Gott de Häaschoa woat opp disem Boajch aule Velkja een fatet Mol reedmoaken, een Mol von Häwwien, von moakjs Fatspeise, jereinichtem Häwwien.

⁷Un hee woat opp disem Boajch däm Schleia venichten, dee aule Velkja bedakjt, un de Dakj, dee äwa aule Nazionen jedakjt es.

⁸Däm Doot veschlinjt hee opp eewich; un de Har, Gott, woat de Tronen aufweschen von jiedrem Aunjesecht, un de Schmach von sienem Volkj woat hee wajchdoonen von de gaunze Ieed. Dan de Har haft jerät.

⁹Un aun janem Dach woat maun sajen: Kjikj doa, ons Gott, opp däm wie vetruden, daut hee ons raden wudd; doa es de Har, opp däm wie vetruden! Lot ons froo sennen un ons freien en siene Radinj!

¹⁰Dan de Haunt Gottes woat opp disem Boajch ruen; un Moab woat unja am veklunjt woaren, aus Stroo en eenem Mesthupe veklunjt woat.

¹¹Un hee woat siene Henj (en Moab) utbreeden, aus een Schwama dee utbreet, om to schwamen; un hee woat (Moab) sien Huachmoot doldrekjen met de faulschheit siene Henj.

¹²Un diene fauste, huach stonende Miaren woat hee dolrieten, raufschmieten, oppe Ieed schmieten bat en däm Stoff.