Read De Bibel JHF Jesaja 27 Bible Online

Jesaja 27 - De Bibel JHF bible

Jesaja 27

¹Aun janem Dach woat de Har met sienem Schwieet, däm hoaden un groote un stoakjem, strofen däm Leviatan, de ranende Schlang, un däm Leviatan, de kjrelende Schlang, un woat daut Ojjeheia doot moaken, daut em Mäa es.

²Aun janem Dach woat maun sinjen: Een Wienboajch vom basten Wien! Besinjt am!

³Ekj, de Har, bewoa am, bejeet am jieda Uagenblekj; daut nuscht am stroft, bewoa ekj am Nacht un Dach.

⁴Oaja ha ekj nich. Oo, haud ekj Hachels un Diestle ver mie, em Kjrich wudd ekj opp an loosgonen, an aula toop vebrennen!

⁵Ooda maun must mienen Schutz sieekjen, Fräd met mie moaken, Fräd moaken met mie.

⁶Enne Tookunft woat Jakob Wartlen schlonen, Israel blieejen un utloten; un see woaren däm Ieedkjreis met Frucht fellen.

⁷Haft hee daut jeschloagen, aus hee sienen Schläajna schluach? Ooda es daut omjebrocht worden, aus hee jane Omjebrochte ombrocht?

⁸Met Mot, aus du daut (Fru, Israel) vestadsd, hast du met ar jerecht; hee juach daut wajch met sienem stoakjen Frodem aum Oostwint Dach.

⁹Doarom woat doaderch bedakjt woaren Jakob siene Schult. Un dit es de gaunze Frucht dee siene Sinden wajchnemt: Wan hee aule Steena vom Aultoa soo aus veschloagne Kaulkjsteena moaken wudd, un Ascherim un Sonnenstendasch sikj nich mea opphäwen.

¹⁰Dan de fauste Staut es eensom, eene vestade un velotne Wonstäd aus ne Stap; doabowen weiden Kjalwa, un doabowen loagren see un fräten äare Asta auf;

¹¹wan äare Asta drieech jeworden sent, woaren see aufjebroaken: Frues komen un stekjen an aun. Dan daut es kjeen veständjet Volkj; doarom erboarmt junt äwa am nich, dee daut jemoakt, un dee daut jeschaufen haft, bewiest am kjeene Jnod.

¹²Un daut woat passieren aun janem Dach, doa woat de Har Jeträajd draschen von däm Stroom Eufrat bat nom Stroom Ägipten; un jie woaren toopjesaumelt woaren, eena nom aundren, jie Kjinja Israel.

¹³Un daut woat passieren aun janem Dach, doa woat en eene groote Posaun jeblost woaren, un de Veloarne em Launt Assur un de Vejoagde em Launt Ägipten woaren komen un däm Harn aunbäden opp däm heiljen Boajch en Jerusalem.