Read De Bibel JHF Jesaja 3 Bible Online

Jesaja 3 - De Bibel JHF bible

Jesaja 3

¹Dan kjikj, de Har, Gott de Häaschoa, nemt von Jerusalem un von Judäa Stett un Unjastettunk wajch, jiedre Stett von Broot un jiedre Stett vom Wota;

²Held, Kjrichsmaun, Rechta, Profeet, Woasaja un Eltesta;

³däm Bowaschten äwa 50 un däm Aunjeseenen un däm Rotjäwa, un däm jeschekjlichen Kjensla un däm erfoarnen Zaubra.

⁴Un ekj woa Jinjlinje (Junges) to äare Ferschten moaken, un Kjinja sellen äwa an harschen.

⁵Un daut Volkj woat sikj jäajensiedich bedrenjen, de eena däm aundren, un een jiedra sienem Näakjsten; de Jung woat frajch jäajen däm Jreis oppstonen, un de Veachta jäajen däm Väanämen.

⁶Wan eena sienen Brooda en sienem Vodahus jript un sajcht: Du hast een Bowakjleet, du saust ons Aunfiera sennen; un daut Toopbräakjen es unja diene Haunt!

⁷Soo woat hee aun janem Dach siene Stemm erhäwen un sajen: Ekj kaun kjeen Wundadokta sennen; es doch en mienem Hus kjeen Broot noch Kjleet: Moakt mie nich toom Aunfiera em Volkj.

⁸Dan Jerusalem es jestolpat un Juda jefollen, wiels äare Tung un äare Doten jäajen däm Harn sent, om to trotze de Uagen siene Harlichkjeit.

⁹Dee äa Jesechtsutdruck zeicht jäajen an; un von äare Sinden räden see openboa aus Sodom, see veheimliche dee nich. Wee äare Seel! Dan fa sikj selfst moaken see Beeset reed.

¹⁰Sajcht vom Jerajchten, daut et am goot gonen woat; dan de Frucht von äare Haundlunk woaren see jeneeten.

¹¹Wee däm Gottloosen! Daut woat am Iebel gonen; dan daut doonen siene Henj woat am aunjedonen woaren.

¹²Mien Volkj, - siene Bedrekja sent kjliene Kjinja, un Frues harschen äwa an. Mien Volkj, diene Leida fieren err, un däm Wajch von diene Stiej ha see die veschlungen.

¹³De Har steit doa, om to rechten; un hee steit opp, om de Velkja too rechten.

¹⁴De Har woat ons Jerecht jäwen met de Eltestasch von sienem Volkj un äare Ferschten: Un jie, jie ha däm Wienboajch vedorwen, de raup de Älendje es en june Hiesa;

¹⁵waut ha jie, daut jie mien Volkj veklunjen un daut Aunjesecht de Älendje unjadrekjen? Sajcht de Har, Gott de Häaschoa.

¹⁶Un de Har säd: Wiels de Dajchta Zion stolt sent, un omhäa gonen met jestrakjte Halsa un plinkjrende Uagen, un schiblen omhäa un met äare Footkjäde kjnirschen:

¹⁷Soo woat de Har däm Schädel de Dajchta Zion kol moaken, un de Har woat äare Schaund opdakjen.

¹⁸Aun janem Dach woat de Har daut Schmuck de Footkjäde un de Stearnbenja un de Haulfmon wajchnäme;

¹⁹de Uarinj un de Oarmkjäde un de Schleiasch;

²⁰de Koppbenj un de Schrettkjäde de Jirtel un daut Rikjbuddeltje un de Amulette;

²¹de Finjarinj un de Näsrinj;

²²de Prachtkjleeda un de Bowarakj un daut Äwahenjduak un de Biedels;

²³de Hauntspäjel un de Hamden un de Heed un de wiede Schleia.

²⁴Un daut woat passieren, enne Städ scheenrikjend woat Jestank sennen, un staut een Jirtel een Strank, un staut kruse Hoa eene Glauts, un staut Prunkkjleet een Sakduak, Brauntmol staut Scheenheit.

²⁵Diene Mana woaren derch daut Schwieet faulen, un diene Helden em Kjrich.

²⁶Un [de Dajchta Zion] äare Dooasch woaren kloagen un truaren, un see woaren utjeplindat sennen, sikj oppe Ieed dolsaten.