Read De Bibel JHF Jesaja 31 Bible Online

Jesaja 31 - De Bibel JHF bible

Jesaja 31

¹Wee dän, dee no Ägipten raufgonen om Help, sikj opp Pieed veloten, un dee äa Vetruen opp Woages saten, wiels daut väle sent, un opp Rittasch, wiels dee väl sent; un dee opp däm Heiljen Israels nich kjikjen un nodäm Harn nich froagen!

²Oba uk hee es weis un fieet Onjlekj doatoo, un nemt siene Wieed nich trigj; un hee steit jäajen daut Hus de Iebel doonende opp un jäajen dee äare Help, dee Fräfel doonen.

³Un de Ägipta sent Menschen nich Gott, un äare Pieed sent Fleesch nich Jeist. Un de Har strakjt siene Haunt ut, un de Helpa enjsten sikj, un daut felt dee, däm jeholpen woat; un see woaren aula metenaunda omkomen.

⁴Dan aulsoo haft de Har to mie jerät: Aus de Leiw un de junge Leiw, jäajen däm de Hoadsmenje tooproopen woat, äwa sienem Raup gnorrt, ver äare Stemm sikj nich enjst un sikj ver äarem Loarm nich jeft, aulsoo woat Gott de Häaschoa raufstieen, om opp däm Boajch Zion un opp sienem Aunboajch too strieden.

⁵Soo aus schwäwende Väajel, aulsoo woat Gott de Häaschoa Jerusalem bewoaren; bewoaren un raden, schoonen un frie moaken.

⁶Dreit om, Kjinja Israel, nodäm, von däm jie soo wiet aufjegonen sent!

⁷Dan aun janem Dach woaren see aufschu haben, een jiedra von siene Jetta von Selwa un siene Jetta von Golt, dee äare Henj junt too eene Sind jemoakt ha.

⁸Un Assur woat derch een Schwieet faulen, nich von eenem Maun; un een Schwieet, nich von eenem Mensch, woat an vetäaren. Un daut woat ver daut Schwieet ranen, un siene Jinjlinje woaren too Deenstoabeit jedwungen woaren.

⁹Un sien Fels woat fa Schrakj wajchranen, un siene Ferschten woaren ver dän Tieekjen vezoagen, sajcht de Har, dee sien Fia en Zion un sien Owen en Jerusalem haft.