Read De Bibel JHF Jesaja 32 Bible Online

Jesaja 32 - De Bibel JHF bible

Jesaja 32

¹Kjikj, een Kjennich woat en Jerajchtichkjeit rejieren; un de Ferschten, see woaren no Rajcht harschen.

²Un een Maun woat sennen aus eene Tooflucht ver däm Wint un een Schutz ver däm Räajenstorm, aus Wotastreem enne drieeje Jäajent, aus de Schauten von eenem jewaultjen Fels em utjedräjden Launt.

³Un de Uagen de seenende woaren nich mea vekjleewt sennen, un de Uaren de Hierende woaren oppmoakjen;

⁴un daut Hoat de Onbesonnene woat Erkjantnis erlangen, un de Tungen de doa stottre woaren rechtich un dietlich räden.

⁵De schlajchta Mensch woat nich mea iedla jenant un de Schumla nich mea väanäm jenant woaren.

⁶Dan een schlajchta Mensch räd Noaheit; un sien Hoat jeit met Fräfel om, om Orrajcht too eewen un Errtum to räden jäajen däm Harn, om de Hungaje Seel ladich to loten un von däm Darschtjen daut Jedrenkj trigjtohoolen.

⁷Un de Schumla, sien Jereetschoft es bees: Hee erfinjt beese Aunschläaj, om de Älendje derch Läajesräden too Grunt too rechten, selfst wan de Oama sien Rajcht deit.

⁸Oba de Iedla erfinjt Iedlet, un opp Iedlet besteit hee.

⁹Stot opp, jie sorjloose Frues, hieet miene Stemm! Jie sechre Dajchta, nemt too Uaren miene Räd!

¹⁰Noch Joa un Dach woa jie zetren, jie Sechre; dan de Wienarnte es doahan, de Oftarnte kjemt nich.

¹¹Bäbt, jie Sorjloose; zettat, jie Sechre! Trakjt junt ut un siet noaktich un ombinjt junt met Sakduak de Lenden!

¹²Aun de Brost schleit maun sikj wäajen de leeftolje Felda, wäajen de fruchtboare Wienstakj.

¹³Opp mienem Volkj sien Aka komen Struck un Hachels opp, jo, opp aule frooe Hiesa un de frooe Staut.

¹⁴Dan de Paulaust es oppjejäft, veloten daut Jetimmel de Staut; Ofel un Torm sellen opp eewich aus Heel deenen, de Wiltäsel too eene Freid, toom Weidlaunt de Häaden,

¹⁵bat de Jeist woat von Bowen äwa ons utjegoten, un de Wieste toom fruchtboarem Launt woat, un daut fruchtboare Launt däm Woolt jlikj jeacht woat.

¹⁶Un daut Rajcht woat sikj en de Wieste raufloten, un de Jerajchtichkjeit opp däm fruchtboarem Launt wonen;

¹⁷un daut Woakj de Jerajchtichkjeit woat Fräd sennen, un de Arnt de Jerajchtichkjeit Ru un Sechaheit eewich.

¹⁸Un mien Volkj woat aun eene Frädenswonstäd wonen un en sechre Woninj un aun stelle Rustäde.

¹⁹Un daut woat hoaglen biem Dolfaulen (Omfaulen) vom Woolt, un de Staut woat enne Läacht vesinkjen.

²⁰Jlekjseelich jie, dee jie aun aule Wota seien, frie omhäa gonen loten däm Foot de Rinda un de Äsel!