Read De Bibel JHF Jesaja 34 Bible Online

Jesaja 34 - De Bibel JHF bible

Jesaja 34

¹Komt hiahäa, jie Nazionen, om to hieren; un jie Velkja, moakjt opp! Daut hieet de Ieed un aules waut dee felt, de Ieedkjreis un aules, waut opp ar waust!

²Dan de Oaja Gottes jeit jäajen aule Nazionen ut, un sien Jrim jäajen aul äa Häa. Hee haft ar de Vetiljung hanjejäft, toom schlachten jejäft.

³Un äare Jeschloagne woaren hanjeschmäten, un de Jestank von äare Kjarpa sticht opp, un de Boaj veranen von äarem Bloot.

⁴Un aulet Himmelshäa veschmelt; un de Himmel woaren toopjerolt aus een Buak; un aul äa Häa fält rauf, aus daut Blaut vom Wienstock auffält un aus daut vewalkjte vom Fiejenboom.

⁵Dan mien Schwieet es em Himmel bedrunken; kjikj, opp Edom foat daut rauf un opp daut Volkj von mienem Baun toom Jerecht.

⁶Daut Schwieet Gottes es voll Bloot, daut es saut jemoakt von Fat, von Bloot de fate Schop un Bakj, Nearefat vonne Bakj; dan de Har haft een Schlachtopfa en Bozra un een grootet schlachten em Launt Edom.

⁷Un Biffel faulen met an han, un Rinda met Ossen; un äa Launt woat jedrenkjt met Bloot, un äa Stoff von Fat jedrenkjt.

⁸Dan de Har haft eenen Dach de Rach, een Joa de Vejeltunk fa de Rajchte Zions.

⁹Un de Streem Edoms vewaundlen sikj en Pekj, un sien Stoff en Schwäwel; un sien Launt woat too brennendem Pekj.

¹⁰Dach un Nacht jeit daut nich ut, eewich sticht sien Ruak nohecht. Von Jeschlajcht too Jeschlajcht licht daut vewust, fa emma un eewich trakjt kjeena doaderch.

¹¹Un Pelikan un Iejel (Stachelschwien) nämen daut aus Ieejentum, un Ule un Kraujen wonen doabennen. Un hee trakjt doaräwa de Motschnua de Vewustunk un daut Senkjblie äwa daut Ladje.

¹²Siene Väanämen — kjeene sent doa, dee daut Kjennichtum utroopen; un aule siene Ferschten sent tonuscht jeworden.

¹³Un en siene Paulausten komen Hachels opp, Brennkrut un Diestle en siene Schlossa; un daut woat to eene Wonstäd de Schakale, to eene Wonunk de Strausse.

¹⁴Un Wiestetiere trafen met wille Hunj toop, un Bakj bejäajnen sikj metenaunda; jo, doa rut daut Nachtjespanst un finjt fa sikj eene Rustäd.

¹⁵Doa moakt sikj de Feilaschlang äa Nast un lajcht Eia un broot an en äarem Schauten ut; jo, doa vesaumlen sikj de Osodla, eene nom aundren.

¹⁶Forscht em Buak Gottes no un läst! Daut fält nich eent von dise, kjeent velist daut aundre. Dan mien Mul, hee haft daut jeboden; un sien Jeist, hee haft an toopjebrocht;

¹⁷un hee selfst haft an daut Loss jeschmäten, un siene Haunt haft an daut toojedeelt met de Motschnua. Eewich woaren see daut besetten, von Jeschlajcht too Jeschlajcht doabennen wonen.