Read De Bibel JHF Jesaja 38 Bible Online

Jesaja 38 - De Bibel JHF bible

Jesaja 38

¹Aun jane Doag wort Hiskia krank toom Stoawen. Un Jesaja, de Sän Amoz, de Profeet, kaum no am un säd to am: Soo sajcht de Har: Bestal dien Hus, dan du woascht stoawen un nich jesunt woaren.

²Doa dreid Hiskia sien Aunjesecht no de Waunt un bäd toom Harn un säd:

³Ach, Har! Jedenkj doch, daut ekj ver dienem Aunjesecht jewaundelt ha en Woarheit un met onjedeeldem Hoat, un daut ekj jedonen ha, waut goot es en diene Uagen! Un Hiskia hield sea.

⁴Doa wia daut Wuat Gottes too Jesaja aulsoo:

⁵Go han un saj too Hiskia: Soo sajcht de Har, de Gott von dienem Voda David: Ekj ha dien Jebäd jehieet, ekj ha diene Tronen jeseenen; kjikj, ekj well too diene Doag 15 Joa doatolajen.

⁶Un von däm Kjennich von Assur siene Haunt well ekj die un dise Staut raden; un ekj well dise Staut bewoaren.

⁷Un daut woat die daut Tieekjen sennen vom Harn, daut de Har dit Wuat doonen woat, daut hee jerät haft:

⁸Kjikj, ekj lot däm Schauten, dee aun däm Sonnenwiesa Ahas derch de Sonn raufjegonen es, om 10 Stoopen trigj gonen. Un de Sonn jinkj 10 Stoopen aum Sonnenwiesa trigj, dee see raufjegonen wia.

⁹Hiskias Schreft, däm Kjennich von Juda, aus hee krank wia un von siene Krankheit jesunt wort.

¹⁰Ekj säd: En de Ru miene Doag saul ekj hangonen no de Puaten vom Scheol, sie bestroft om miene Äwaje Joaren.

¹¹Ekj säd: Ekj woa däm Harn nich seenen, däm Harn em Launt de Läwendje; ekj woa Menschen nich mea seenen bie de Bewona vom Doodenrikj (griechisch: Hades).

¹²Miene Wonunk es aufjebroaken un wia von mie wajchjefieet aus eene Hoadsbood. Ekj ha, aus biem wäwen, mien Läwen opjerolt: Vom wäwa Klue schneet hee mie loos. Vom Dach bat de Nacht woascht du een Enj met mie moaken!

¹³Ekj muak miene Seel bat Zemorjes stell - aus de Leiw, aulsoo vebruak hee aule miene Knoakes. Vom Dach bat de Nacht woascht du een Enj met mie moaken!

¹⁴Aus een Schwaulm, aus een Kraunkje, soo kloagd ekj; ekj drommeld aus ne Duw. Met Schmach kjikjten miene Uagen ne Hecht: Oo Har, mie es bang! Stie fa mie aus Birj en!

¹⁵Waut saul ekj sajen? Daut hee mie daut toojesajcht un daut uk utjefieet haft. Ekj well väasechtich waundlen aule mien Joaren wäajen de Trua von miene Seel.

¹⁶Oo Har! Doaderch läft maun, un doarenn besteit daut Läwen von mienem Jeist. Un du moakst mie jesunt un helst mie aum Läwen.

¹⁷Kjikj, toom Heil wort mie bettret Lieden: Du, du trockst leeftolich miene Seel ut de venichtende Kul; dan aule miene Sinden hast du hinja dienen Rigjen jeschmäten.

¹⁸Dan de Scheol loft die nich, de Doot riemt die nich; dee en de Kul raufjefoaren sent, luaren nich opp diene Woarheit.

¹⁹De Läwendja, de Läwendja, dee loft die, aus ekj vondoag: De Voda lat de Kjinja diene Woarheit to weeten.

²⁰De Har wia reed, mie to raden; un wie wellen mien Seidenspell, aule Doag en onsem Läwen, em Hus Gottes spälen.

²¹Un Jesaja säd, daut maun eene Fiejekuak aus Plosta nemt un am opp daut Schwäa lajen saul, doamet hee jesunt woat.

²²Un Hiskia säd: Woont es daut Tieekjen, daut ekj em Hus Gottes nopp gonen woa?