Read De Bibel JHF Jesaja 39 Bible Online

Jesaja 39 - De Bibel JHF bible

Jesaja 39

¹To jane Tiet schekjt Merodach-Baladan, de Sän Baladan, de Kjennich von Babel, een Breef un Jeschenkj aun Hiskia; dan hee haud jehieet, daut hee krank jewast wia un wada jesunt jeworden wia.

²Un Hiskia freid sikj äwa an un wees an sien Schauzhus: Daut Selwa un daut Golt un de Jewerzen un daut kostboare Eelj; un sien gaunzet Jereetschoftshus, un aules, waut sikj en sienem Schauz befung; daut wia nuscht en sienem Hus un en siene gaunze Harschoft, daut Hiskia an nich jewast haud.

³Doa kaum Jesaja, de Profeet, nom Kjennich Hiskia un säd to am: Waut ha dise Mana jesajcht? Un wuahäa sent dee no die jekomen? Un Hiskia säd: Ut eenem wieden Launt sent see no mie jekomen, von Babel.

⁴Un hee säd: Waut ha see en dienem Hus jeseenen? Un Hiskia säd: See ha aules jeseenen, waut en mienem Hus es; daut jeft nuscht en miene Schauzkoma, daut ekj an nich jewast ha.

⁵Doa säd Jesaja too Hiskia: Hea daut Wuat Gottes de Häaschoa!

⁶Kjikj, daut komen Doag, doa aules, waut en dienem Hus es un waut diene Vodasch jesaumelt ha bat opp disem Dach, no Babel wajchjebrocht woaren woat; daut woat nuscht äwabliewen, sajcht de Har.

⁷Un von diene Säns, dee ut die väakomen woaren, dee du jebären woascht, woat maun nämen, un see woaren Hoffbeaumte em Paulaust vom Kjennich en Babel sennen.

⁸Un Hiskia säd to Jesaja: Daut Wuat Gottes es goot, daut du jerät hast; un hee säd: Jo, daut woat Fräd un Bestaund en miene Doag sennen.