Read De Bibel JHF Jesaja 4 Bible Online

Jesaja 4 - De Bibel JHF bible

Jesaja 4

¹Un aun janem Dach woaren 7 Frues eenen Maun jriepen un sajen: Wie wellen ons ieejnet Broot äten un ons met onse ieejne Kjleeda bekjleede; blooss lot ons no dienem Nomen jenant woaren, nemm onse Schmach wajch.

²Aun janem Dach woat de Auflaja Gottes too eene Zia un to Harlichkjeit sennen, un de Frucht de Ieed toom Stolt un toom Schmuck fa de Wajchjeranden Israels.

³Un daut woat passieren, wäa en Zion äwajebläwen un wäa en Jerusalem äwajeloten es, woat heilich jenant (heeten), een jiedra, dee toom Läwen enjeschräwen es en Jerusalem:

⁴Wan de Har de Orreinichkjeit de Dajchta Zion aufjewoschen un de Blootschult Jerusalems ut äare Medd wajchjefieet haben woat derch däm Jerechtjeist un derch däm Jeist de Vetiljung.

⁵Un de Har woat äwa jiedre Wonstäd vom Boajch Zion un äwa siene Vesaumlunk eene Wolkj un äwadach een Ruak schaufen, un däm Glauns von eenem flaumendem Fia de Nacht; dan äwa de gaunze Harlichkjeit woat eene Dakj sennen.

⁶Un eene Bood woat sennen toom Schauten äwa Dach vere Hett, un to Tooflucht un toom Vestäakj fa Storm un Räajen.