Read De Bibel JHF Jesaja 46 Bible Online

Jesaja 46 - De Bibel JHF bible

Jesaja 46

¹Bel kjrelt sikj, Nebo sinkjt toop; äare Bilda sent däm Tia un däm Vee tomdeel jeworden; june Bilda de jie omhäa druagen, sent oppjeloden, eene Laust fa daut meede Vee.

²See sent toopjesunken, ha sikj aula toop jekjrelt un ha de Laust nich jerat; un see selfst sent enne Jefangenschoft jegonen.

³Hieet opp mie, Hus Jakob un aule Äwajebläwne vom Hus Israel, dee jie vom Muttalief aun oppjeloden, vom Muttaschoot aun jedroacht worden sent!

⁴Un bat en jun Jreisenella sie ekj de selja, un bat to junem grauen Hoa woa ekj junt droagen; ekj ha daut jedonen, un ekj well häwen, un ekj woa droagen un raden.

⁵Met wäm well jie mie vejlikjen un jlikj stalen un aus mie moaken, daut wie jlikj sent?

⁶Dee, dee Golt ut däm Biedel schedden un Selwa met de Wichtschol wäaje, lie eenem Goldschmäd, daut hee eenen Gott doarut moakt; see bäden aun, jo, see faulen ver am dol.

⁷See häwen am opp, droagen am opp äare Schulren un loten am rauf opp siene Städ, un hee steit doa: Von sienem Plauz jeit hee nich wajch. Maun schricht uk to am, oba hee auntwuat nich: Kjeenem rad hee ut siene Noot.

⁸Denkjt doaraun un woat faust, nämt daut to Hoaten, jie Iebel doonende!

⁹Jedenkjt aun däm Aunfank de Uatiet häa, daut ekj Gott sie, un sest es kjeena, daut ekj Gott sie un doa es kjeena aus ekj;

¹⁰dee ekj vom Aunfank aun daut Enj vekjindj, un vonne oole Tieden häa, waut noch nich passieet es; dee ekj saj: Mien Rotschluss saul too staund komen, un aul mien Wooljefaulen woa ekj doonen;

¹¹dee ekj eenen Raupvoagel roop vom Oosten häa, ut eenem wieden Launt däm Maun von mienem Rotschluss. Ekj ha jerät, un woa daut uk komen loten; ekj ha daut jedocht, un woa daut uk utfieren.

¹²Hieet opp mie, jie Trotzje, dee jie wiet auf von de Jerajchtichkjeit sent!

¹³Ekj ha miene Jerajchtichkjeit noda jebrocht, see es nich wiet auf, un mien Heil siemt nich; un ekj jäw en Zion daut Heil, un Israel miene Harlichkjeit.