Read De Bibel JHF Jesaja 48 Bible Online

Jesaja 48 - De Bibel JHF bible

Jesaja 48

¹Dit hieet, jie vom Hus Jakob! Dee jie met däm Nomen Israel jenant un met de Wota Juda väajekomen sent, dee bie däm Nomen Gottes schwieren un däm Gott Israels [riement] jedenkjen, doch nich en Woarheit un nich en Jerajchtichkjeit;

²dan no de heilje Staut nanen see sikj, un see stette sikj opp däm Gott Israels, Gott de Häaschoa es sien Nomen:

³Ekj ha daut Frieejoa - ver lange Tiet vekjindicht, un ut mienem Mul es daut väajegonen, un ekj ha daut hieren loten; plazlich vollfieed ekj daut, un daut troff en.

⁴Wiels ekj wist, daut du hoat best, un daut dien Jenekj eene iesane Sän un dien Stiern von Koppa es,

⁵soo ha ekj daut ver lange Tiet die vekjindicht, ea daut enntroff, ha ekj die daut hieren loten; doamet du nich sajen kust: Mien Jetzenbilt haft daut jedonen, un mien jeschnitztet un mien jegotnet Bilt haft daut befoolen.

⁶Du hast daut jehieet, bedenkj daut aules; un jie, well jie daut nich bekjanen? Von nu aun lot ekj die Nieet hieren un Vestoaknet un waut du nich jewist hast.

⁷Nu es daut passieet un nich ver lange Tiet, un ver disem Dach hast du nich doavon jehieet; doamet du nich sajen kust: Kjikj, daut ha ekj jewist.

⁸Du hast daut nich jehieet noch jewist, donn wia dien Ua noch op; dan ekj wist, daut du ontru best, un daut maun die vom Muttalief aun eenen Äwaträda jenant haft.

⁹Om mienem Nomen wellen vetrakj ekj mienen Oaja, un wäajen mienen Riem bedwinj ekj am, die toom gooden, om die nich uttoroten.

¹⁰Kjikj, ekj ha die jereinicht, doch nich aus Selwa; ekj ha die jeprooft em Schmeltowen met Älent.

¹¹Om mienthaulwen, om mienthaulwen well ekj daut doonen; dan woo wudd mien Nomen jelastat woaren! Un miene Iea jäw ekj kjeenem aundren.

¹²Hea opp mie, Jakob, un Israel, mien Beroopna! Ekj sie, dee doa es, ekj sie de Ieeschta, ekj sie uk de Latsta.

¹³Miene Haunt haft uk de Ieed jemoakt, un miene Rajchte de Himmel utjebreet; ekj roop an too: Aula toop stonen see doa.

¹⁴Vesaumelt junt, jie aula, un hieet! Wäa unja an haft dit vekjindicht? Däm de Har leeft, dee woat sien Wooljefaulen vollfieren aun Babel un sienen Oarm aun de Chaldäa.

¹⁵Ekj, ekj ha jerät, jo, ekj ha am jeroopen; ekj ha am komen loten, un sien Wajch woat jelinjen.

¹⁶Komt noda no mie, hieet dit! Ekj ha vom Aunfank aun nich em Veborjnen jerät; von dee Tiet aun, aus daut wort, wia ekj doa. - Un nu haft de Har, Gott, mie jeschekjt un sien Jeist.

¹⁷Soo sajcht de Har, dien Erleesa, de Heilja Israels: Ekj sie de Har, dien Gott, dee die lieet, to doonen, waut die nuzt, dee die opp däm Wajch leit, däm du gonen saust.

¹⁸Oo daut du jeacht hautst opp miene Jebooten! Dan wudd dien Fräd jewast sennen aus een Stroom, un diene Jerajchtichkjeit aus de Mäareswalle;

¹⁹un dien Somen wudd jewast sennen aus de Saunt, un de Auflaja von dienem Lief aus de Sot (Kjeena); sien Nomen wudd nich utjerot un nich vetilcht woaren ver mienem Aunjesecht.

²⁰Trakjt von Babel ut, rant ut Chaldäa met ne jubelnde Stemm; vekjindicht, lot dit hieren, brinjt daut - bat aun daut Enj de Ieed! Sajcht: De Har haft sienen Kjnajcht Jakob erleest.

²¹Un an darscht nich, aus hee an derch de Wieste fieed; hee leet an Wota ut däm Fels ranen, hee spoold däm Fels, un Wota rand doa rut. -

²²Kjeen Fräd däm Gottloosen! Sajcht de Har.