Read De Bibel JHF Jesaja 52 Bible Online

Jesaja 52 - De Bibel JHF bible

Jesaja 52

¹Woak opp, woak opp; kjleed die, Zion, en diene Macht! Kjleed die en diene Prachtkjleeda, Jerusalem, du heilje Staut! Dan von nu aun woat kjeen Onbeschnädna un kjeen Orreina en die nengonen.

²Schedda däm Stoff von die auf, sto opp, sat die han, Jerusalem! Moak die loos von diene Haulsfassle, du jefangne Dochta Zion!

³Dan soo säd de Har: Emsonst sent jie vekoft worden, un nich fa Jelt sell jie jeleest woaren.

⁴Dan soo sajcht de Har, Gott: No Ägipten trock mien Volkj aum Aunfank rauf, om sikj doa opptohoolen; un Assur haft daut onen Uasoak bedrekjt.

⁵Un nu, waut ha ekj hia too doonen? Sajcht de Har. Dan mien Volkj es emsonst wajchjenomen; siene Beharscha juche, sajcht de Har, un bestendich, däm gaunzen Dach, woat mien Nomen jelastat.

⁶Doarom saul mien Volkj mienen Nomen kjanen lieren, doarom aun janem Dach erfoaren, daut ekj daut sie, dee doa sajcht: Hia sie ekj!

⁷Woo leeftolich sent opp de Boaj dee äare Feet, dee de Frooe Bootschoft vekjindicht, dee Fräd vekjindicht, dee de Goode Bootschoft brinjt, dee Heil vekjindicht, dee too Zion sajcht: Dien Gott harscht aus Kjennich!

⁸De Stemm diene Wajchtasch! See häwen de Stemm opp, see juche aula toop; dan Uag en Uag seenen see, woo de Har Zion trigjbrinjt.

⁹Bräakjt en Jubel ut, jucht aula toop, jie Trimma Jerusalem! Dan de Har haft sien Volkj jetreest, haft Jerusalem erleest.

¹⁰De Har haft sienen heiljen Oarm ver de Uagen aule Nazionen opjedakjt, un aule Enj de Ieed seenen de Radinj von onsem Gott.

¹¹Got, got, got rut von doa, rieet nuscht Orreinet aun! Got rut ut äare Medd, reinicht junt, dee jie daut Jescherr Gottes droagen!

¹²Dan jie sellen nich haustich uttrakjen, un nich en Flucht wajchgonen; dan de Har jeit ver junt häa, un jun Wajchta es de Gott Israels.

¹³Kjikj, mien Kjnajcht woat met Ensecht haundlen; hee woat erhowen un oppjehowen woaren un sea huach sennen.

¹⁴Soo aus sikj väle äwa die jewundat ha, - soo wia sien utseenen veschompieet, mea aus irjent eenen Maun sient, un siene Jestault, mea aus de Menschenkjinja -

¹⁵soo aus hee väle Nazionen en Staunen vesad (brocht), äwa am woaren Kjennichs äa Mul veschluten. Dan see woaren seenen, waut an nich vetalt wia; un waut see nich jehieet hauden, woaren see woanämen.