Read De Bibel JHF Jesaja 54 Bible Online

Jesaja 54 - De Bibel JHF bible

Jesaja 54

¹Jubel, du Onfruchtboare, dee nich jebuaren, bräakj en Jubel ut un juch, dee kjeene Weedoag jehaut haft! Dan de Velotne woat mea Kjinja haben aus de Befriede, sajcht de Har.

²Moak däm Rum en dienem Zelt wiet, un breed de Behenjen (Zeltdakjen) en diene Woninj ut; spoa nich! Moak diene Strenj lank, un diene Pols stäakj faust nenn!

³Dan du woascht die to Rajchten un to Linkje utbreeden; un dien Somen woat de Nazionen aus Ieejentum nämen, un de velotne Städa besiedlen.

⁴Forcht die nich, dan du woascht nich beschämt woaren, un schäm die nich, dan du woascht nich too Schaund woaren; sonda du woascht de Schmach von diene Jugent vejäten un de Schaund daut du Wätfru wieescht nich mea jedenkjen.

⁵Dan dee die jemoakt haft, es dien Maun, - Gott de Häaschoa es sien Nomen - un de Heilja Israels es dien Erleesa: Hee woat dee Gott de gaunze Ieed jenant woaren.

⁶Dan aus een velotnet un em Jeist betriebte Fru roopt die de Har, un aus eene Fru de Jugent, wan see vestat es, sajcht dien Gott.

⁷Eenen kjlienen Uagenblekj ha ekj die veloten, oba met grootem Erboarmen well ekj die saumlen;

⁸em Oaja ha ekj eenen Uagenblekj mien Aunjesecht ver die vestoaken, oba met eewje Jnod woa ekj mie äwa die erboarmen, sajcht de Har, dien Erleesa.

⁹Dan dit saul mie sennen aus daut Wota Noah, aus ekj schwua, daut daut Wota Noah de Ieed nich mea äwaschwamen sellen; soo ha ekj jeschwuaren, daut ekj nich mea äwa die oajalich, noch die schellen woa.

¹⁰Dan de Boaj muchten veschwinjen un de Aunboaj waklen, oba miene Jnod woat nich von die aufgonen un mien Frädensbunt nich waklen, sajcht de Har, dien Erboarma.

¹¹Du Älendje, Stormbeweajde, Onjetreestete! Kjikj, ekj laj diene Steena en Blieglaunz un jrind die met Safieren;

¹²un ekj moak diene Däakja (Fensta) ut Rubin un diene Dooasch von Karfunkel un aule diene Jrensen von wieetvollen Steena.

¹³Un aule diene Kjinja woaren vom Harn jelieet, un de Fräd von diene Kjinja woat groot sennen.

¹⁴Derch Jerajchtichkjeit woascht du faust woaren. Wiet auf von Bedrekjung, dan du bruckst die nich enjsten, fa Jefoa, dan dee woat die nich noda komen.

¹⁵Kjikj, wan maun sikj uk toopdeit, soo es daut nich von mie ut; wäa sikj jäajen die toopdeit, dee woat aun die toom Faul komen.

¹⁶Kjikj, ekj ha däm Schmett jeschaufen, dee daut Kolenfia aunblost un daut Jewäa moakt, no sienem Hauntwoakj; un ekj ha däm Vedoawa jeschaufen, om tonicht to moaken.

¹⁷Kjeenem sien Jewäa, daut jäajen die jemoakt woat, saul daut jelinjen; un jiedre Tung, dee ver Jerecht jäajen die oppsteit, woascht du schuldich spräakjen. Daut es daut Oawgoot de Kjnajchts Gottes un von mie ut äare Jerajchtichkjeit, sajcht de Har.