Read De Bibel JHF Jesaja 55 Bible Online

Jesaja 55 - De Bibel JHF bible

Jesaja 55

¹Loos, jie aule Darschtje, komt nodäm Wota; un dee jie kjeen Jelt ha, komt, kjeept en un ät! Jo, komt, kjeept onen Jelt un emsonst Wien un Malkj!

²Wuarom wäaj jie Jelt auf fa daut, waut nich Broot es, un jun Jewenst fa daut, waut nich saut moakt? Hieet doch opp mie un ät daut Goode, un june Seel erjatst sikj aum Fat!

³Neijt jun Ua un komt no mie; hieet, un june Seel woat läwen. Un ekj well eenen eewjen Bunt met junt schluten: De jewesse Jnod von David. -

⁴Kjikj, ekj ha am to eenem Zeij fa de Velkja jesat, toom Ferscht un Jebeeda de Nazionen.

⁵Kjikj, du woascht eene Nazion doatooroopen, dee du nich kjansd; un eene Nazion, dee die nich kjand, woat no die ranen, om Gottes wellen, dienem Gott, un wäajen daut Heilje Israels; dan hee haft die harlich jemoakt.

⁶Sieekjt däm Harn, soolang hee sikj finjen lat; roopt am aun, soolang hee dichtbie es.

⁷De Gottloosa velat sienen Wajch un de Maun vom Onheil siene Jedanken; un hee dreit om nom Harn, no onsem Gott, soo woat hee sikj äwa am erboarmen, dan hee es rikj aun Vejäwunk.

⁸Dan miene Jedanken sent nich june Jedanken, un june Wäaj sent nich miene Wäaj, sajcht de Har.

⁹Dan soo aus de Himmel hecha es aus de Ieed, soo sent miene Wäaj hecha aus june Wäaj un miene Jedanken aus june Jedanken.

¹⁰Dan soo aus de Räajen un de Schnee vom Himmel rauffelt un nich doahan trigjjeit, hee haft de Ieed jedrenkjt un befrucht un dee lat ut, un däm Seimaun Sot jejäft un Broot däm Ätenden:

¹¹Aulsoo woat mien Wuat sennen, daut ut mienem Mul jeit: Daut woat nich ladich trigjkomen, sonda daut woat utrechten, waut mie jefällt, un derch fieren, toowaut ekj daut jeschekjt ha.

¹²Dan en Freid woa jie utgonen un en Fräd jeleit woaren; de Boaj un de Aunboaj woaren ver junt en Jubel utbräakjen, un de Beem oppem Flekj woaren en de Henj klautsche;

¹³enne Städ Hachelstruck woaren Ziepressen oppgonen, un enne Städ Brennkrut woaren Myrte oppgonen. Un daut woat däm Harn toom Riem, to eenem eewjen Denkjteakjen sennen, daut nich utjerot woat.