Read De Bibel JHF Jesaja 56 Bible Online

Jesaja 56 - De Bibel JHF bible

Jesaja 56

¹Soo sajcht de Har: Bewoat daut Rajcht un eeft Jerajchtichkjeit! Dan mien Heil es dichtbie, om to komen, un miene Jerajchtichkjeit, om openboa to woaren.

²Jlekjseelich de Mensch, dee dit deit, un daut Menschenkjint, daut doaraun fausthelt: Dee däm Sabat helt, daut hee am nich entheilicht, un siene Haunt doaväa bewoat, irjent waut Beeset to doonen!

³Un de Sän de Framde, dee sikj däm Harn aunjeschloten haft, saul nich sajen: De Har woat mie secha von sienem Volkj utschluten; un de Veschnädna sajcht nich: Kjikj, ekj sie een drieeja Boom.

⁴Dan soo sajcht de Har: Däm Veschnädnen (Beschnädnen), dee miene Sabaten hoolen un daut erwälen, wuaraun ekj Jefaulen ha, un aun mienen Bunt fausthoolen,

⁵an well ekj en mienem Hus un en miene Mia eenen Plauz jäwen, un eenem Nomen, bäta aus Säns un Dajchta: Eenen eewjen Nomen jäwen, dee nich utjerot woaren saul.

⁶Un de Säns de Framde, dee sikj däm Harn aunjeschloten ha, om am to deenen un däm Nomen Gottes too leewen, am aus Kjnajcht to sennen, eenen jiedren, dee däm Sabat helt, daut hee am nich entheilicht, un dee doa fausthoolen aun mienem Bunt:

⁷Dee woa ekj no mienem heiljen Boajch brinjen un an froo moaken en mienem Bädhus; äare Brauntopfa un äare Schlachtopfa sellen aunjenäm opp mienem Aultoa sennen. Dan mien Hus woat een Bädhus jenant woaren fa aule Velkja.

⁸Daut räd de Har, Gott, dee de Vestade Israels saumelt: No am, no siene Jesaumlde, woa ekj noch mea doatoosaumlen.

⁹Komt häa, om to fräten, aule, jie Tieren vom Flekj (Stap), jie Tieren em Woolt!

¹⁰Siene Wajchta sent blint, sent aula onen Erkjantnis; see aula sent stomme Hunj, dee nich balen kjennen; see dreemen, ligjen doa, leewen daut Dreemen.

¹¹Un de Hunj sent jierich, dee niemols weeten wan see saut sent; un daut sent Hoads! See ha kjeen Vestentnis; see aula dreien sikj opp äaren ieejnen Wajch, een jiedra von an auleen opp sien Väadeel:

¹²«Komt häa, ekj well Wien holen, un lot ons stoakjet Jedrenkj supen; un de morjescha Dach saul aus disa sennen, harlich äwa aule Mot!»