Read De Bibel JHF Jesaja 57 Bible Online

Jesaja 57 - De Bibel JHF bible

Jesaja 57

¹De Jerajchta kjemt om, un kjeena nemt daut to Hoaten, un de Fromme woaren wajchjeropt, onen daut et wäa beacht, daut de Jerajchta ver däm Onjlekj wajchjeropt woat.

²Hee jeit toom Fräd en; see ruen opp äare Loagastäd, een jiedra, dee jlikj, ver sikj han, däm Wajch jinkj.

³Un jie, komt noda, jie Kjinja de Zaubra, Somen de Ehebräakja un de Hua!

⁴Äwa wäm moak jie junt lostich, äwa wäm moak jie daut Mul op un strakjt de Tung rut? Sent jie nich Kjinja de Äwaträdunk, een Somen de Läajes,

⁵dee jie fa de Jetzen brunstliede unja jiedrem jreenen Boom, dee jie Kjinja enne Läachten schlachten unja de Kluften de Steena?

⁶Aun de glaute Bach Steena wia dien Deel; see, see wieren dien Loss; uk Drinkjopfa gootst du an ut, opfat an Speisopfa. Sull ekj mie doaräwa treesten?

⁷Opp eenem huagen un scheenem Boajch schluachst du dien Loaga opp; du stieechst doa uk nopp, om Schlachtopfa too opfren.

⁸Un hinjre Däa un däm Post sadsd du die een Denkjmol. Dan von mie aufjedreit dakjst du op un best noppjestäajen, muakst dien Loaga breet, un du muakst dien Loon met an ut; du leewsd äa Bieloaga, bekjikjst äare Noaktheit.

⁹Un du jinjst nom Kjennich met Eelj un muakst väl diene scheenrikjende Saulwen; un du schekjst diene Booten wiet ut un buagst die bat nom Scheol.

¹⁰Derch dienen wieden Wajch best du meed jeworden, doch du sajchst nich: Daut es emsonst! Du kjrichst diene Krauft, doarom best du nich schwak jeworden.

¹¹Un ver wäm hast du die trigjjetrocken un jeenjst, daut du jeloagen hast, un aun mie nich dochst, daut nich too Hoaten nemst? Sie ekj nich stell jewast, un zwoa aul lange Tiet? Un fa mie haudst du nich Angst.

¹²Ekj, ekj woa diene Jerajchtichkjeit toweeten loten; un diene jemoakte Woakjen, see woaren die nuscht nutzen.

¹³Wan du schrichst, soo muchten die diene Jetzenhupes raden! Oba een Wint woat an aula wajchfieren, een Frodem an wajchnäme. Oba wäa no mie siene Tooflucht nemt, woat daut Launt oawen un mienen heiljen Boajch besetten.

¹⁴Un maun woat sajen: Moakt Bon, moakt Bon; moakt eenen Wajch reed, riemt ut mienem Volkj sienem Wajch jiedret Hindanis wajch!

¹⁵Dan soo sajcht de Huaga un Huagerhoowna, dee en Eewichkjeit wont, un sien Nomen Heilja es: Ekj won Huach un em Heilichtum, un bie däm, dee veschloagne un jeboagne Jeistes es, om to beläwen däm Jeist de Jebekjten un to beläwen daut Hoat de Veschloagne.

¹⁶Dan ekj well nich eewich rechten un nich emma oajalich sennen; dan de Jeist wudd ver mie veschmachten, un de Seel, dee ekj jemoakt ha.

¹⁷Wäajen de Misdot un siene Habsucht sie ekj oajalich un schluach an, endäm ekj mie vestuak un oajalich wia; un daut (Volkj) jinkj aufjefollen opp däm Wajch von sienem Hoat.

¹⁸Siene Wäaj ha ekj jeseenen un woa am heelen; un woa am leiden, un am un siene Truarnde met Troost vejelten.

¹⁹Ekj well Frucht de Leppen schaufen, sajcht de Har: Fräd, Fräd däm Wieden un däm dee dichtbie es, un ekj well am heelen. -

²⁰Oba de Gottloose sent aus daut oppjeweelde Mäa; dan daut kaun nich ruich sennen, un siene Wota weele Schlaum un Blott opp.

²¹Kjeen Fräd däm Gottloosen! Sajcht mien Gott.