Read De Bibel JHF Jesaja 6 Bible Online

Jesaja 6 - De Bibel JHF bible

Jesaja 6

¹Aum Doodesjoa vom Kjennich Usija, doa sach ekj däm Har setten opp eenem huagen un erhoownem Troon, un siene Seem felden däm Tempel.

²Serafiem stunden äwa am; een jiedra von an haud 6 Flichten: Met 2 bedakjt hee sien Aunjesecht, un met 2 bedakjt hee siene Feet, un met 2 fluach hee.

³Un eena roopt däm aundren too un säd: Heilich, heilich, heilich es Gott de Häaschoa, dee gaunze Ieed es voll siene Harlichkjeit!

⁴Un daut bäbde de Gruntfausten de Schwalen von de Stemm de Roopende, un daut Hus wort met Ruak jefelt.

⁵Un ekj säd: Wee mie! Dan ekj sie veloaren; dan ekj sie een Maun von orreine Leppen, un enne Medd von eenem Volkj von orreine Leppen won ekj; dan miene Uagen ha däm Kjennich, däm Gott de Häaschoa, jeseenen.

⁶Un eena de Serafiem fluach no mie; un en siene Haunt wia eene jlieejende Kol, dee hee met de Tang vom Aultoa jenomen haud.

⁷Un hee beread mien Mul doamet un säd: Kjikj, dit haft diene Leppen bereat; un soo es diene Schult wajchjenomen un diene Sinden toojedakjt [veseent].

⁸Un ekj hieed de Stemm vom Harn, dee doa säd: Wäm saul ekj schekjen, un wäa woat fa ons gonen? Doa säd ekj: Hia sie ekj, schekj mie.

⁹Un hee säd: Go han un saj to disem Volkj: Hierend hieet, un vestonen nich; un seenent kjikjt, un erkjanen nich!

¹⁰Moak daut Hoat von disem Volkj fat, un moak siene Uaren schwoa, un vekjleew siene Uagen: Doamet daut met siene Uagen nich seenen un met siene Uaren nich hieren un sien Hoat nich vesteit, un daut nich trigjdreit un jeheelt woat.

¹¹Un ekj säd: Woo lang, Har? Un hee säd: Bat de Städa vewust sent, onen Bewona, un de Hiesa onen Menschen, un daut Launt too Wiestelaunt vewaundelt es,

¹²un de Har de Menschen wiet wajch jedonen haft, un de velotne Uaten väl sent enne Medd vom Launt.

¹³Un es noch een tieendel doabennen, soo woat daut wadamol vetilcht woaren, aus de Terebinten un aus de Ieekj, von dee, wan see jefollen sent, een Wartelstock blift; een heilja Somen es sien Wartelstock.