Read De Bibel JHF Jesaja 60 Bible Online

Jesaja 60 - De Bibel JHF bible

Jesaja 60

¹Sto opp, un woa Licht! Dan dien Licht es jekomen, un de Harlichkjeit Gottes es äwa die oppjegonen.

²Dan kjikj, Diestanis bedakjt de Ieed un Dunkel de Velkja; oba äwa die jeit de Har opp, un siene Harlichkjeit schient äwa die.

³Un Nazionen woaren no dienem Licht hangonen, un Kjennichs nodäm Glauns von dienem Oppgank.

⁴Häw diene Uagen opp un kjikj omhäa! See aula vesaumlen sikj, komen no die: Diene Säns komen von wiet häa, un diene Dajchta woaren oppe Henj doahan jedroacht.

⁵Dan woascht du daut seenen un fa Freid strole, un dien Hoat woat kloppen un wiet woaren; dan daut Mäa met äare Menj woat sikj no die dreien, daut Rikjtum de Nazionen woat no die komen.

⁶Eene Menj Kameelen woat die bedakjen, junge Kameelen von Midian un Efa. See woaren aula toop ut Scheba komen, Golt un Weiruak brinjen, un see woaren daut Loff Gottes froo vekjindjen.

⁷Aule Häaden von Kedar woaren sikj no die vesaumlen, de Bakj von Nebajot woaren die toom Deenst stonen: Wooljefaulennt woaren see opp mienen Aultoa komen; un daut Hus, miene Pracht, woa ekj prachtvoll moaken.

⁸Wäa sent dise, dee aus eene Wolkj jefloage komen un aus Duwen no äare Klotkjes?

⁹Dan opp mie luaren de Inslen, un de Schepp von Tarsis trakjen doahan, om diene Kjinja utem wieden Launt to brinjen, un äa Selwa un äa Golt met an, nom Nomen Gottes, dienem Gott, un nom Heiljen Israels, wiels hee die harlich jemoakt haft.

¹⁰Un de Framde Säns woaren de Mia buen, un äare Kjennichs die bedeenen; dan en mienem Jrim ha ekj die jeschloagen, oba en miene Jnod ha ekj mie äwa die erboarmt.

¹¹Un diene Dooasch woaren emma op stonen; Dach un Nacht woaren see nich toojeschloten woaren, om no die däm Rikjtum de Nazionen to brinjen un äare wajchjefieeden Kjennichs.

¹²Dan de Nazion un daut Kjennichrikj, dee die nich deenen wellen, woaren unjagonen, un dise Nazionen woaren jewess vetilcht woaren.

¹³De Harlichkjeit vom Libanon woat no die komen, Ziepressen, Platane un Buchsbeem metenaunda, om de Städen von mienem Heilichtum too ziere; un woa de Städ fa miene Feet harlich moaken.

¹⁴Un de Kjinja diene Bedrekja woaren jeboagen no die komen, un aule, dee die veacht ha woaren ver diene Footsole dolfaulen; un see woaren die nanen: Staut Gottes, Zion vom Heiljen Israel.

¹⁵Enne Städ daut du veloten wieescht un jehaust, un kjeena doaderch jinkj, well ekj die toom eewjen Stolt moaken, too Pracht von Jeschlajcht too Jeschlajcht.

¹⁶Un du woascht de Malkj de Nazionen sue, un aun de Kjennichsbrost sue; un du woascht erkjanen, daut ekj, de Har, dien Rada sie, un ekj, de Majchtja von Jakob, dien Erleesa.

¹⁷Enne Städ Koppa woa ekj Golt brinjen, un enne Städ Iesa Selwa brinjen, un enne Städ Holt Koppa, un enne Städ Steena Iesa. Un ekj woa Fräd too diene Vewaultunk saten, un de Jerajchtichkjeit too dienem Oppaussa.

¹⁸Maun woat wiedahan nich mea von Jewault en dienem Launt hieren, von Schoden un Vetrimrunk en diene Jrensen; sonda diene Mia woascht du Heil nanen, un diene Dooasch Riem.

¹⁹De Sonn woat die nich mea Äwadach toom Licht sennen, noch toom schienen de Mon; sonda de Har woat die toom eewjen Licht sennen, un dien Gott too diene Veharlichunk.

²⁰Diene Sonn woat wiedahan nich mea unjagonen, noch dien Mon sikj trigjtrakjen; dan de Har woat die toom eewjen Licht sennen. Un de Truadoag woaren een Enj ha.

²¹Un dien Volkj, see aula woaren Jerajchte sennen, woaren daut Launt opp eewich besetten, see, een Auflaja von miene Plaunten, een Woakj von miene Henj, to miene Veharlichunk.

²²De Kjlansta woat too 1 000 woaren, un de Jerinjsta to eenem jewaultjen Volkj. Ekj, de Har, woa daut to siene Tiet schwind utfieren.