Read De Bibel JHF Jesaja 61 Bible Online

Jesaja 61 - De Bibel JHF bible

Jesaja 61

¹De Jeist vom Harn, Gottes, es opp mie, wiels de Har mie jesaulft haft, om däm Saunftmootjen frooe Bootschoft to brinjen, wiels hee mie jeschekjt haft, om to vebinjen, dee veschloagne Hoaten ha, de Jefangne Frieheit uttoroopen, un de Jebungne daut Jefenkjnis optomoaken;

²om daut aunjenäme Joa Gottes uttoroopen un däm Rachedach von onsem Gott un aule Truaje too treesten;

³om de Truaje von Zion opptorechten un an Koppschmuck enne Städ Ausch, Freideneelj enne Städ Trua, een Prachtkjleet enne Städ eenen vezoagden Jeist to jäwen; doamet see Terebinten de Jerajchtichkjeit jenant woat, eene Plaunt (jesiedet) Gottes, to siene Veharlichunk.

⁴Un see woaren de uaoole Trimma oppbuen, de Vewiestunge de oole Tieden opprechten; un see woaren de vewuste Städa nie moaken, waut wiest lach von Jeschlajcht too Jeschlajcht.

⁵Un Framde woaren doa stonen un june Häaden weiden, un Säns de Framde woaren june Akalied un june Wiengoadna sennen.

⁶Oba jie, jie woaren Priesta Gottes jenant woaren; maun woat junt Deena von onsem Gott nanen. Jie woaren de Nazionen äare Rikjdoms jeneeten un en äare Harlichkjeit junt riemen.

⁷Fa june Schmach woa jie daut Dobbelde ha, un enne Städ de Schaund woaren see jublen äwa äa Deel; doarom woaren see en äarem Launt daut Dobbelde besetten, woaren eewje Freid ha.

⁸Dan ekj, de Har, leew daut Rajcht, ekj hauss däm fräfelhauften Raup; un ekj woa an äare Belooninj jewess jäwen un eenen eewjen Bunt met an schluten.

⁹Un äa Somen woat bekaunt woaren unja de Nazionen, un äare Auflajasch enne Medd de Velkja: Aula, dee an seenen, woaren an erkjanen, daut see een Somen sent, däm de Har jesäajent haft.

¹⁰Ekj frei mie sea en däm Harn; miene Seel saul sikj freien en mienem Gott! Dan hee haft mie Heilskjleeda aunjetrocken, däm Mauntel de Jerajchtichkjeit mie aunjetrocken, aus een Briegaum met Koppbunt no Priesta oat, un aus eene Brut sikj met äarem Schmuck schmock moakt.

¹¹Dan aus de Ieed äa Jewauss väabrinjt, un aus een Goaden daut jeseide oppgonen lat, aulsoo woat de Har, Gott, Jerajchtichkjeit un Riem oppgonen loten ver aule Nazionen.