Read De Bibel JHF Jesaja 62 Bible Online

Jesaja 62 - De Bibel JHF bible

Jesaja 62

¹Om Zions wellen well ekj nich stell sennen, un om Jerusalems wellen well ekj nich stell sennen, bat äare Jerajchtichkjeit väakjemt aus een Lichtglauns un äa Heil aus een brennenda Fiastock.

²Un de Nazionen woaren diene Jerajchtichkjeit seenen, un aule Kjennichs diene Harlichkjeit; un du woascht met eenem nieen Nomen jenant woaren, däm daut Mul Gottes bestemmen woat.

³Un du woascht eene prachtvolle Kroon sennen en de Haunt Gottes un een kjennichlicha Stearnbaund en dienem Gott siene Haunt.

⁴Maun woat nich mea die «Velotne» nanen, un dien Launt nich mea «Wieste» jenant; sonda maun woat die «Miene Lost aun äa» nanen, un dien Launt «Befriede»; dan de Har woat Lost aun die haben, un dien Launt woat befriet woaren.

⁵Dan aus een Jinjlinkj sikj met eene Junkfru befriet, soo woaren sikj diene Kjinja met die befrieen; un aus de Briegaum sikj aun siene Brut freit, soo woat dien Gott sikj äwa die freien.

⁶Opp diene Mia, Jerusalem, ha ekj Wajchta bestalt; däm gaunzen Dach un de gaunze Nacht woaren see kjeenen Uagenblekj stell sennen. Jie, dee jie däm Harn jedenkjen sellen, jennt junt kjeene Ru -

⁷un lot am kjeene Ru, bat hee Jerusalem faust jemoakt un bat hee daut toom Riem opp de Ieed moakt!

⁸De Har haft jeschwuaren bie siene Rajchte un bie sienem stoakjem Oarm: Wan ekj wiedahan diene Fiend dien Jeträajd toom Äten jäw, un wan de Säns de Framde dienen jungen Wien drinkjen woaren, om däm du die aufjemieecht hast!

⁹Sonda dee daut ensaumlen, sellen daut äten un däm Harn danken; un dee daut ennbrinjen, sellen am drinkjen enne Väahäw von mienem Heilichtum.

¹⁰Got, got derch de Dooasch, moakt däm Wajch fa daut Volkj reed; moakt Bon, moakt de Gaussen reed, reinicht dee von Steena; häft een Tieekjen äwa de Velkja!

¹¹Kjikj, de Har haft eene Norecht schaule loten bat aun daut Enj de Ieed: Sajcht de Dochta Zion: Kjikj, dien Heil kjemt; kjikj sien Loon es bie am, un siene Vejeltunk jeit ver am häa.

¹²Un maun woat an nanen: Daut heilje Volkj, dee Erleeste Gottes; un die woat maun nanen: Dee Jesochte, Staut, dee nich mea veloten woaren woat.