Read De Bibel JHF Jesaja 63 Bible Online

Jesaja 63 - De Bibel JHF bible

Jesaja 63

¹Wäa es disa, dee von Edom kjemt, von Bozra en dunkelroode Kjleeda, disa, prachtich en siene Kjleeda, dee omhäa jeit en siene groote Krauft? Ekj sie daut, dee en Jerajchtichkjeit räd, dee kjraftich es toom halpen. -

²Wuarom es dien Kjleet soo root, un sent diene Kjleeda aus dee von eenem Wienprasa? -

³Ekj ha däm Wien auleen jeklunjt, un von de Velkja wia kjeena bie mie; un ekj veklunjd an en mienem Oaja, vestaumpt an en mienem Jrim; un äa Sauft spretst opp miene Kjleeda, un ekj besudelt mien gaunzet Kjleet.

⁴Dan de Dach de Rach wia en mienem Hoaten, un daut Joa miene Erleesunk wia jekomen.

⁵Un ekj kjikjt omhäa, un doa wia kjeen Halpa; un ekj staund, un doa wia kjeen Unjastetta. Doa holp mie mien Oarm, un mien Jrim, hee haft mie unjastät.

⁶Un ekj klunjd de Velkja en mienem Oaja dol un muak an bedrunken en mienem Jrim, un ekj leet äare Sauft oppe Ieed ranen.

⁷Ekj well de Jnod Gottes jedenkjen, däm Riem Gottes, no aulem, waut de Har ons erwäsen haft, un däm välen gooden jäajen däm Hus Israel, daut hee an erwäsen haft no sienem Erboarmen un no de Menj siene Jnod.

⁸Un hee säd: See sent mien Volkj, Kjinja, dee nich ontru woaren; un hee woat an toom Rada woaren.

⁹En aul äare Bedrenkjnis wia hee bedrenjt, un de Enjel von sienem Aunjesecht haft an jerat. En siene Leew un en sienem Erboarmen haft hee an erleest; un hoof an nohecht un druach an aule Doag von de oole Tieden häa.

¹⁰Oba see sent wadaspanstich jewast un ha sienen Heiljen Jeist betriept; doa dreid hee sikj jäajen an en eenen Fiend om: Hee selfst street jäajen an.

¹¹Doa docht sien Volkj aun de oole Doag, de Doag Moses: «Wua es dee, dee an ut daut Mäa nohecht fieed met de Hoads siene Häad? Wua es dee, dee sienen Heiljen Jeist en äare Medd jeef;

¹²dee sienen harlichen Oarm aun de rajchte Sied Moses mettrakjen leet; dee de Wota ver an häa spoold, om sikj eenen eewjen Nomen too moaken;

¹³dee an derch de deepe Streem trakjen leet, aus de Pieed oppe Stap, onen daut see enjstlich wieren?

¹⁴Aus daut Vee, daut enne Läacht raufjeit, brocht de Jeist Gottes an too Ru. Aulsoo hast du dien Volkj jeleit, om die eenen harlichen Nomen too moaken.»

¹⁵«Kjikj vom Himmel rauf un see, von de Wonstäd diene Harlichkjeit un diene Majestät! Wua es dien Iewa un diene Macht? Daut räaje von dienem Ennalichen un diene Erboarmungen hoolen sikj jäajen mie trigj.

¹⁶Dan du best ons Voda; dan Abraham weet nich von ons, un Israel kjant ons nich; du, Har, best ons Voda; ons Erleesa von oole Tieden häa es dien Nomen.

¹⁷Wuarom, Har, latst du ons von diene Wäaj auferre, moakst onse Hoaten hoat, daut wie ons nich enjsten? Komm doch trigj om diene Kjnajchts äa wellen, wäajen de Stam von dienem Oawgoot!

¹⁸Fa eene korte Tiet haft dien heiljet Volkj daut beharscht: Onse Jäajna ha dien Heilichtum veklunjt.

¹⁹Wie sent aus soone jeworden, äwa dee du von oole Tieden häa nich jeharscht hast, dee nich jenant jewast sent no dienem Nomen.»