Read De Bibel JHF Jesaja 7 Bible Online

Jesaja 7 - De Bibel JHF bible

Jesaja 7

¹Un daut wia aun de Doag Ahas, däm Sän Jotam, vom Sän Usija, däm Kjennich von Juda, doa trock Rezin, de Kjennich von Sierien, un Pekach, de Sän Remalja, de Kjennich von Israel, nopp no Jerusalem toom Striet jäajen dee selje; oba hee kunn nich jäajen dee selje strieden.

²Un daut wudd däm David sienem Hus berecht un jesajcht: Sierien haft sikj en Efraim jeloagat. Doa bäbd sien Hoat un daut Hoat von sienem Volkj, aus de Beem em Woolt ver däm Wint bäben.

³Un de Har säd to Jesaja: Go doch rut, däm Ahas entjäajen, du un dien Sän Schear-Jaschub, aun daut Enj de Wotaleidinj vonne bowaschte Wotakjwal, no de Gauss Walkerfeld han,

⁴un saj to am: Heed die un vehool die ruich; ha nich Angst, un dien Hoat vezoag nich ver dise beid rieekjaje Brauntstobes, bie de Zorngloot Rezin un Sierien un däm Sän Remalja.

⁵Doarom, daut Sierien Beeset jäajen die jeplont haft, Efraim un de Sän Remalja un jesajcht:

⁶Lot ons jäajen Juda nopp trakjen un em Grauen nenn joagen un daut fa ons ennämen un däm Sän Tabeal toom Kjennich moaken;

⁷soo sajcht de Har Gott: Daut woat nich too staund komen un nich passieren.

⁸Dan Damaskus es daut Haupt von Sierien, un Rezin daut Haupt von Damaskus; un en noch 65 Joa woat Efraim veschmatat woaren, daut et kjeen Volkj mea es.

⁹Un Samaria es daut Haupt von Efraim, un de Sän Remalja daut Haupt von Samaria. Wan jie nich jleewen, woa jie, woarhauft, kjeenen Bestaund ha!

¹⁰Un de Har deed noch, too Ahas räden, un säd:

¹¹Fodda die een Tieekjen vom Harn, dienem Gott; fodda daut em Deepen ooda huach Bowen.

¹²Un Ahas säd: Ekj well nich foddren un well däm Harn nich vesieekjen.

¹³Doa säd hee: Hea doch, David sien Hus! Es daut nich too weinich, Menschen meed too moaken, daut jie uk mienem Gott meed moaken?

¹⁴Doarom woat de Har selfst junt een Tieekjen jäwen: Kjikj, de Junkfru woat schwanga woaren un eenen Sän jebuaren, un woat sienen Nomen Immanuel heeten.

¹⁵Dikjemalkj (Botta) un Honnich woat hee äten, wan hee weet, daut Beese too veschmieten un daut Goode too wälen.

¹⁶Dan ea de Jung weet, daut Beese too veschmieten un daut Goode too wälen, woat daut Launt veloten sennen, fa dee beid Kjennichs fa dee du die enjst.

¹⁷De Har woat äwa die un äwa dien Volkj un äwa daut Hus von dienem Voda Doag komen loten, soo aus see nich jekomen sent von däm Dach, doa Efraim von Juda aufjegonen es - däm Kjennich von Assur.

¹⁸Un daut woat passieren aun janem Dach, doa woat de Har de Fläj, dee aum Enj von de Streem Ägiptens, un de Biee, dee em Launt Assur es, doahan zischen.

¹⁹Un see woaren komen un sikj aula toop raufloten enne Schluchten de steile Boaj un en de Steenretzen un en aulem Hachelstruck un opp aule Drenkje.

²⁰Aun janem Dach woat de Har derch een jedungnet Schäamassa, opp de aundre Sied vom Stroom, derch däm Kjennich von Assur, daut Haupt un daut Hoa de Been aufscheere; jo, uk däm Boat woaren see wajchnäme.

²¹Un daut woat passieren aun janem Dach, daut wäa eene junge Koo un 2 Schop foodren woat.

²²Un daut woat passieren, wäajen de Menj de Malkj woat hee Schmaunt äten, dan Schmaunt un Honnich woat jiedra äten, dee em Launt äwa jebläwen es.

²³Un daut woat passieren aun janem Dach, daut jieda Uat, woa 1000 Wienstakj von 1000 Selwastekja wieren, too Hachels un Diestle woaren jeworden sennen.

²⁴Met Feilasch un Boages woat maun doahan komen; dan daut gaunze Launt woat Hachels un Diestle sennen.

²⁵Un aule Boaj, dee met Hacken jehakt worden, doahan woascht du nich komen, ut Angst fa Hachels un Diestle; un see woaren een Uat sennen, wuahan maun Rinda jajcht, un dee vom Kjlienvee veklunjt woat.