Read De Bibel JHF 3. Mose 10 Bible Online

3. Mose 10 - De Bibel JHF bible

3. Mose 10

¹Un Aaron siene Säns, Nadab un Abihu, naumen een jiedra siene Rieekjapaun un deeden Fia doa nenn un läden Rieekjastoff (Weiruak, seeta Ruak) doanopp un brochten framdet Fia ver Gott, daut hee an nich befoolen haud.

²Doa jinkj Fia vom Harn ut un vebrend an, un see storwen ver däm Harn.

³Un Moses säd to Aaron: Dit es et, waut de Har jerät haft, endäm hee säd: Aun dee, dee mie dichtbie sent, well ekj jeheilicht, un von däm gaunzen Volkj well ekj veharlicht woaren. Un Aaron wia stell.

⁴Un Moses roopt Misael un Elzafan, Ussiel siene Säns, von Aaron sienem Onkel, un säd to an: Komt häa, droacht june Breeda vom Heilichtum wajch, butrem Loaga rut.

⁵Un see kaumen un druagen an en äare Liefrakj butrem Loaga wajch, soo aus Moses jesajcht haud.

⁶Un Moses säd to Aaron un to Eleasar un to Ithamar, siene Säns: June Heipta sell jie nich opdakjen un june Kjleeda nich verieten, doamet jie nich stoawen, un junt nich äwa de gaunze Jemeent oajren; oba june Breeda, daut gaunze Hus Israel, sellen disem Braunt behile, däm Gott aunjerecht haft.

⁷Un von däm Engank vom Zelt de Bejäajnunk sell jie nich wajchgonen, daut jie nich stoawen; dan daut Eelj de Saulwunk Gottes es opp junt. Un see deeden no Moses sienem Wuat.

⁸Un de Har räd too Aaron un säd:

⁹Wien un stoakjet Jedrenkj saust du nich drinkjen, du un diene Säns met die, wan jie en daut Zelt de Bejäajnunk nengonen, daut jie nich stoawen, - eene eewje Sazunk fa june Jeschlajchta -

¹⁰un doamet jie unjascheeden tweschen däm Heiljen un däm Onheiljen un tweschen däm Reinen un däm Onreinen,

¹¹un doamet jie de Kjinja Israel aul dise Sazungen lieren, dee de Har derch Moses to junt jerät haft.

¹²Un Moses räd too Aaron un to Eleasar un to Ithamar, siene Säns, dän äwajebläwnen: Nämt daut Speisopfa, daut von de Fiaopfa Gottes äwablift, un ät daut onjesuat biem Aultoa; dan huachheilich es daut.

¹³Un jie sellen daut äten aum heiljen Uat, dan daut es dien Bestemmdet un daut Bestemmde fa diene Säns von de Fiaopfa Gottes; dan soo es mie befoolen worden.

¹⁴Un de Brost vom Wäwopfa un de Schinkjes vom Häwopfa sell jie äten aun eenem reinen Uat, du un diene Säns un diene Dajchta met die; dan aus dien Bestemmdet un daut Bestemmde fa diene Säns sent dee jejäft von de Dankopfa de Kjinja Israel.

¹⁵Däm Schinkje vom Häwopfa un de Brost vom Wäwopfa sellen see to de Fiaopfa de Fatstekja brinjen, om dee aus Wäwopfa ver däm Harn too schwinjen (opphäwen); un dee sellen die jehieren un diene Säns met die, aus een fa eewich Bestemmdet, soo aus de Har befoolen haft.

¹⁶Un Moses socht iewrich däm Bock toom Sindopfa, un kjikj, hee wia vebrent. Un hee wort äwa Eleasar un Ithamar oajalich, Aaron siene Säns, dee äwajebläwne, un säd:

¹⁷Wuarom ha jie nich daut Sindopfa aum heiljen Uat jejäten? Dan daut es huachheilich; un hee haft daut junt jejäft, om de Ojjerajchtichkjeit de Jemeent too droagen, om Veseenunk fa an ver däm Harn to doonen.

¹⁸Kjikj, daut Bloot von däm seljen es nich en daut Ennaliche vom Heilichtum jebrocht worden; jie sullen daut aulemol em Heilichtum äten, soo aus ekj befoolen ha.

¹⁹Un Aaron räd too Moses: Kjikj, vondoag ha see äa Sindopfa un äa Brauntopfa ver däm Harn jebrocht; un soowaut es mie bejäajent; un haud ekj vondoag daut Sindopfa jejäten, wudd daut en de Uagen Gottes goot jewast sennen?

²⁰Un Moses hieed daut, un daut wia goot en siene Uagen.