Read De Bibel JHF 3. Mose 11 Bible Online

3. Mose 11 - De Bibel JHF bible

3. Mose 11

¹Un de Har räd too Moses un to Aaron un säd to an:

²Räd to de Kjinja Israel un sajcht: Dit sent de Tieren, dee jie von aule Tieren äten sellen, dee oppe Ieed sent.

³Aules waut jespoolde Heefta, un zwoa gaunz jespoolde Heefta haft, un waut wadakaua unjre Tieren es, daut sell jie äten.

⁴Blooss dise sell jie nich äten von de wadakaua un von dän, dee jespoolde Heefta ha; daut Kameel, dan daut kaut wada, oba daut haft kjeene jespoolde Heefta; onrein saul junt daut sennen;

⁵un däm Steendacks, dan hee kaut wada, oba hee haft kjeene jespoolde Heefta; onrein saul hee junt sennen;

⁶un de Hos, dan hee kaut wada, oba hee haft kjeene jespoolde Kleiw; onrein saul hee junt sennen;

⁷un daut Schwien, dan daut haft jespoolde Heefta, zwoa gaunz jespoolde Heefta, oba daut kaut nich wada; onrein saul junt daut sennen.

⁸Von äarem Fleesch sell jie nich äten un äa Os nich aunrieren; onrein saul junt daut sennen.

⁹Dit sell jie von aulem äten, waut em Wota es; aules, waut em Wota Flotte un Scheepen haft, em Mäa un enne Flusse, daut sell jie äten;

¹⁰oba aules, waut kjeene Flotte un Scheepen haft em Mäa un enne Flusse, von aulem Läwenwäsent em Wota un von aulem läwendjen Wäsent, daut em Wota es, daut saul junt een Aufschu sennen;

¹¹jo, een Aufschu sellen see junt sennen; von äarem Fleesch sell jie nich äten, un fa äarem Os sell jie Aufschu haben.

¹²Aules, waut nich Flotte un Scheepen em Wota haft, saul junt een Aufschu sennen.

¹³Un dit saul junt vonne Väajel een Aufschu sennen; dee sellen nich jejäten woaren, een Aufschu sent see; de Odla un de Laumodla un de Mäaodla,

¹⁴un de Hofkje un de Raupväajel no äare Oat,

¹⁵aule Kraujen no äare Oat,

¹⁶un de Strausse un de Ul un de Meew un de Hofkje no äare Oat,

¹⁷un de Kauteul un däm Feschodla un de Ruadrommel,

¹⁸un de Purpurhan un däm Pelikan un däm Oshacka,

¹⁹un däm Storjch un däm Reia no siene Oat, un däm Huppupp un de Flautamus.

²⁰Aulet Jewimmel daut Flichten haft un opp 4 Feet jeit, saul junt een Aufschu sennen.

²¹Blooss dise sell jie äten von aulem Jewimmel, daut opp 4 Feet jeit; waut Schinkjes bowenn äwa de Feet haft, om doamet oppe Ieed too hupsen.

²²Dise sell jie von an äten; de Waundaheischrakj no siene Oat un de Stapheischrakj un de Loofheischrakj un de Grausshoppasch no siene Oat.

²³Oba aulet Krupende met Flichten, daut vea Feet haft, saul junt een Aufschu sennen.

²⁴Un derch dise woa jie junt veonreinjen; jiedra, dee daut Os aunschieet, woat onrein sennen bat Oppenowent;

²⁵un jiedra, dee äa Os opphäft, saul siene Kjleeda wauschen un woat bat Oppenowent onrein sennen.

²⁶Jiedret Tia, daut jespoolde Heefta haft, oba nich gaunz jespoolde Heefta haft un nich wadakaut; onrein saul junt daut sennen; jiedra, dee daut aunschieet, woat onrein sennen.

²⁷Un aules, waut opp siene Tauze jeit, unja aule Tieren, dee opp 4 gonen, see sellen junt onrein sennen; jiedra, dee äa Os aunschieet, woat onrein sennen bat Oppenowent.

²⁸Un wäa äa Os drajcht, saul siene Kjleeda wauschen un woat bat Oppenowent onrein sennen; see sellen junt onrein sennen.

²⁹Un dise sellen junt onrein sennen unjen de Krupende, daut oppe Ieed kjript; de Moltworm un de Mus un de Äajdakjs no äare Oat,

³⁰un de Miageko un de Hachelschwaunz un de Letaah un de Äselmaunda un de Chameleon.

³¹Dise sellen junt unja aule Krupende onrein sennen; jiedra, dee an aunschieet, wan see doot sent, woat bat Oppenowent onrein sennen.

³²Un aules, wuanopp eent von dise fält, wan see doot sent, woat onrein sennen; jiedret heltanet Jefäss ooda Kjleet ooda Fal ooda Sak, jiedret Jereetschoft, met waut eene Oabeit jedonen woat, daut saul em Wota jeduckt woaren un woat bat Oppenowent onrein sennen; dan woat daut rein sennen.

³³Un jiedret Ieednet Jefäss, en däm eent von an nenn fält; aules, waut doabennen es, woat onrein sennen, un daut selfst sell jie vebräakjen.

³⁴Aulet Äten, daut jejäten woat, opp däm von disem Wota kjemt, woat onrein sennen; un aulet Jedrenkj, daut jedrunken woat, woat onrein en jiedrem dise Jefässa sennen.

³⁵Un aules, woa nopp äa Os fält, woat onrein sennen; Owen un Hieet sellen doljebroaken woaren, see sent onrein, un onrein sellen see junt sennen.

³⁶Doch Kjwalen un Kule, Wotaläch, woaren rein sennen; oba wäa daut Os doabennen aunschieet, woat onrein sennen.

³⁷Un wan von äarem Os oppem Sotjeträajd fält, daut jeseit woat, soo es daut rein;

³⁸oba wan Wota opp däm Jeträajd jedonen woat, un daut fält von däm Os doanopp, soo saul junt daut onrein sennen.

³⁹Un wan een vom Vee stoaft, daut junt toom Äten deent; wäa daut Os aunschieet, woat bat Oppenowent onrein sennen.

⁴⁰Un wäa von däm Os at, saul siene Kjleeda wauschen un woat bat Oppenowent onrein sennen; un wäa daut Os drajcht, saul siene Kjleeda wauschen un woat bat Oppenowent onrein sennen.

⁴¹Un aulet Krupendet, daut oppe Ieed kjript, es een Aufschu; daut saul nich jejäten woaren.

⁴²Aules waut oppem Buck kjript, un aules, waut opp 4 jeit, bat aulem Välfeetjen vom Krupenden, daut oppe Ieed kjript; jie sellen daut nich äten; dan see sent een Aufschu.

⁴³Moakt junt nich selfst toom Aufschu derch een krupendet Tia, un veonreinicht junt nich derch an, soo daut jie doaderch onrein woaren.

⁴⁴Dan ekj sie de Har, jun Gott; soo heilicht junt un siet heilich, dan ekj sie heilich. Un jie sellen junt selfst nich veonreinjen derch irjent een krupendet Tia, daut oppe Ieed kjript.

⁴⁵Dan ekj sie de Har, dee junt ut däm Ägiptenlaunt rutjefieet haft, om jun Gott to sennen; soo siet heilich, dan ekj sie heilich.

⁴⁶Daut es daut Jesaz vom Vee un vonne Väajel un von jiedrem läwendjen Wäsent, daut sikj em Wota bewäacht, un von jiedrem Wäsent, daut oppe Ieed kjript;

⁴⁷om to unjascheeden tweschen däm Onreinen un däm Reinen, un tweschen de Tieren, daut jejäten woat, un däm Tia, daut nich jejäten woaren saul.