Read De Bibel JHF 3. Mose 13 Bible Online

3. Mose 13 - De Bibel JHF bible

3. Mose 13

¹Un de Har räd too Moses un Aaron un säd:

²Wan een Mensch aun de Hut opp sienem Fleesch een Jeschwollst ooda een Jrint ooda Hutflajcht kjricht, un daut woat enne Hut opp sienem Fleesch toom Utsauziebel, soo saul hee no Aaron, däm Priesta, jebrocht woaren, ooda no eenem von siene Säns, de Priesta.

³Un de Priesta bekjikjt daut Hutiebel opp sienem Fleesch, un daut Hoa en däm Iebel es witt jeworden, un daut Iebel es deepa aus de Hut opp sienem Fleesch, soo es daut det Iebel von Utsauz; un sitt de Priesta daut, soo saul hee am fa onrein erkjläaren.

⁴Un wan de Städ opp siene Fleeschhut witt es, un daut nich deepa es aus de Hut, un daut Hoa es nich witt jeworden, soo saul de Priesta däm, dee daut Iebel haft, säwen Doag enschluten.

⁵Un aum säwenden Dach bekjikjt de Priesta daut, un kjikj, daut Iebel es en siene Uagen stonen jebläwen, daut Iebel haft nich om sikj enne Hut jejräpen, soo saul de Priesta am toom tweeden Mol säwen Doag enschluten.

⁶Un bekjikjt de Priesta daut aum säwenden Dach toom tweeden Mol, un kjikj, daut Iebel es blauss jeworden, un daut Iebel haft nich om sikj enne Hut jejräpen, soo saul de Priesta am fa rein erkjläaren; daut es een Jrint; un hee saul siene Kjleeda wauschen, un hee es rein.

⁷Oba wan de Jrint enne Hut om sikj jript, nodäm hee sikj däm Priesta jewäsen haft to siene Reinjunk, soo saul hee sikj toom tweeden Mol wiesen;

⁸un de Priesta bekjikjt am, un kjikj, de Jrint haft enne Hut om sikj jejräpen, soo saul de Priesta am fa onrein erkjläaren; daut es de Utsauz.

⁹Wan een Utsauziebel aun eenem Mensch entsteit, soo saul hee nom Priesta jebrocht woaren.

¹⁰Un de Priesta bekjikjt am, daut es een wittet Jeschwollst enne Hut, un daut Hoa es witt jeworden, un eene Städ met reiwem Fleesch es em Jeschwollst,

¹¹soo es daut een oola Utsauz enne Hut opp sienem Fleesch, un de Priesta saul am fa onrein erkjläaren; hee saul am nich enschluten, dan hee es onrein.

¹²Oba wan de Utsauz enne Hut utbrakjt, un de Utsauz de gaunze Hut von däm, dee daut Iebel haft, bedakjt, von sienem Kopp bat to siene Feet, wuahan uk de Priesta kjikjen kaun;

¹³un de Priesta bekjikjt am, un kjikj, de Utsauz haft sien gaunzet Fleesch bedakjt, soo saul hee däm, dee daut Iebel haft, fa rein erkjläaren; haft sikj daut en gaunz witt vewaundelt, soo es hee rein.

¹⁴Oba aun däm Dach, doa reiwet Fleesch aun am jeseenen woat, woat hee onrein sennen.

¹⁵Un sitt de Priesta daut reiwe Fleesch, soo saul hee am fa onrein erkjläaren; daut reiwe Fleesch es onrein; daut es een Utsauz.

¹⁶Oba wan daut reiwe Fleesch sikj veendat un wada witt woat, soo saul hee nom Priesta komen;

¹⁷un bekjikjt am de Priesta, un kjikj, daut Iebel es witt jeworden, soo saul de Priesta däm, dee daut Iebel haft, fa rein erkjläaren; dan hee es rein.

¹⁸Un wan em Fleesch, en däm siene Hut, een Schwäa entsteit un wada heelt,

¹⁹un daut entsteit aune Schwäastäd een wittet Jeschwollst ooda eene witt-rode Städ, soo saul hee sikj däm Priesta wiesen;

²⁰un bekjikjt am de Priesta, un kjikj, de Städ es deepa aus de Hut, un sien Hoa es witt jeworden, soo saul de Priesta am fa onrein erkjläaren; daut es et Iebel vom Utsauz, hee es em Schwäa utjebroaken.

²¹Un wan de Priesta am bekjikjt, un kjikj, doa es kjeen wittet Hoa, un de Städ es nich deepa aus de Hut un es blauss, soo saul de Priesta am säwen Doag enschluten.

²²Oba wan hee enne Hut om sikj jript, soo saul de Priesta am fa onrein erkjläaren; daut es daut Iebel.

²³Un wan de Plak aun siene Städ stonen blift, wan dee nich om sikj jejräpen haft, soo es daut de Noaw vom Schwäa; un de Priesta saul am fa rein erkjläaren.

²⁴Ooda wan enne Hut vom Fleesch eene Brauntwund entsteit, un de Brauntmol de Brauntwund kjricht eene witt-rode ooda witte Plak,

²⁵un de Priesta bekjikjt am, un kjikj, daut Hoa oppe Plak es witt jeworden, un dee es deepa aus de Hut, soo es daut de Utsauz; hee es en de Brauntwund utjebroaken, un de Priesta saul am fa onrein erkjläaren; daut es daut Iebel vom Utsauz.

²⁶Un wan de Priesta am bekjikjt, un kjikj, doa es kjeen wittet Hoa opp de Plak, un es nich deepa aus de Hut un es blauss, soo saul de Priesta am säwen Doag enschluten.

²⁷Un de Priesta saul am aum säwenden Dach bekjikjen; wan hee enne Hut om sikj jript, soo saul de Priesta am fa onrein erkjläaren; daut es daut Iebel vom Utsauz.

²⁸Un wan de Plak aun siene Städ stonen blift, wan hee nich enne Hut om sikj jejräpen haft, soo es daut Schwäa von de Brauntwund; un de Priesta saul am fa rein erkjläaren, dan daut es de Noaw vonne Brauntwund.

²⁹Un wan een Maun ooda eene Fru een Iebel aum Haupt ooda aum Boat kjricht,

³⁰un de Priesta bekjikjt daut Iebel, un kjikj, daut es deepa aus de Hut, un gold-jäl, dennet Hoa es doabowen, soo saul de Priesta am fa onrein erkjläaren; daut es Schorf, daut es Utsauz aum Haupt (Kopp) ooda aum Boat.

³¹Un wan de Priesta daut Iebel vom Schorf bekjikjt, un kjikj, daut es nich deepa aus de Hut, un daut es kjeen dunklet Hoa doabowen, soo saul hee däm, dee daut Schorfiebel haft, säwen Doag enschluten.

³²Un bekjikjt de Priesta daut Iebel aum säwenden Dach, un kjikj, daut Schorf haft nich om sikj jejräpen, un daut es kjeen gold-jälet Hoa doa, un daut Schorf es nich deepa aus de Hut,

³³soo saul hee sikj schäaren; oba daut Schorf saul hee nich schäaren; un de Priesta saul däm, dee daut Schorf haft, toom tweeden Mol fa säwen Doag enschluten.

³⁴Un bekjikjt de Priesta daut Schorf aum säwenden Dach, un kjikj, daut Schorf haft nich enne Hut om sikj jejräpen, un daut es nich deepa aus de Hut, soo saul de Priesta am fa rein erkjläaren; un hee saul siene Kjleeda wauschen, un hee es rein.

³⁵Oba wan, no siene Reinjunk, daut Schorf en siene Hut om sikj jript,

³⁶un de Priesta bekjikjt am, un kjikj, daut Schorf haft enne Hut om sikj jejräpen, soo saul de Priesta nich nom gold-jälen Hoa kjikjen; hee es onrein.

³⁷Un wan en siene Uagen daut Schorf stonen jebläwen es, un daut es doa schwoatet Hoa jewossen, soo es daut Schorf jeheelt; hee es rein, un de Priesta saul am fa rein erkjläaren.

³⁸Un wan een Maun ooda eene Fru aune Hut oppem Fleesch Plaken jekjräajen haft, witte Plaken,

³⁹un de Priesta bekjikjt dee, un kjikj, enne Hut opp äarem Fleesch sent blausse, witte Plaken, soo es daut een Utschlach, dee enne Hut utjebroaken es; hee es rein.

⁴⁰Un wan eenem Maun daut Hoa oppem Haupt utfelt, soo es hee een Kolkopp; hee es rein;

⁴¹un wan am de Kopphoa bowrem Jesecht utfaulen, soo es hee een Kolkopp; hee es rein.

⁴²Un wan aum Hinja- ooda Väa-Glauts een witt-roodet Iebel es, soo es daut de Utsauz, dee aun sienem Hinja- ooda Väa-Glauts utjebroaken es.

⁴³Un bekjikjt de Priesta am, un kjikj, un daut Iebeljeschwollst es witt-root aun siene Hinja- ooda Väa-Glauts, aus daut utseenen von Utsauz enne Hut oppem Fleesch,

⁴⁴soo es hee een Utsauzja Maun: Es hee onrein; de Priesta saul am fa onrein erkjläaren; sien Iebel es aun sienem Haupt.

⁴⁵Un de Utsauzja, aun däm daut Iebel es, siene Kjleeda sellen veräten, un sien Haupt saul onbedakjt sennen, un hee saul sienen Boat vedakjen un utroopen: Onrein, onrein!

⁴⁶Aule Doag, doa daut Iebel aun am es, saul hee onrein sennen; hee es onrein; hee saul auleen wonen, butrem Loaga saul siene Wonunk sennen.

⁴⁷Un wan aun eenem Kjleet een Utsauziebel es, aun eenem Kjleet von Woll ooda aun eenem Kjleet von Leiwent;

⁴⁸ooda aun eenem Jewäwden ooda en eenem Jekjnetten von Boomwoll ooda Woll; ooda aun eenem Fal ooda aun irjent eenem von Fal jemoaktem;

⁴⁹un daut Iebel es jreenlich ooda rootlich aum Kjleet, ooda aum Fal, ooda Jewäwden ooda aum Jekjnetten, ooda aum von Fal jemoaktem, soo es daut dit Iebel vom Utsauz, un maun saul daut vom Priesta bekjikjen loten.

⁵⁰Un de Priesta bekjikjt daut Iebel un schlit daut, aun waut daut Iebel es, säwen Doag en.

⁵¹Un sitt hee daut Iebel aum säwenden Dach, daut et Iebel aum Kjleet om sikj jejräpen haft, ooda aum Jewäwden ooda aum Jekjnetten, ooda aum Fal no aulem, waut von Fal jemoakt woat, soo es daut Iebel een frätenda Utsauz; daut es onrein.

⁵²Un maun saul daut Kjleet, ooda Jewäwden ooda Jekjnetten von Woll ooda von Boomwoll, ooda aulet Jemoakte von Fal, aun waut daut Iebel es, vebrennen; dan daut es een frätenda Utsauz; daut saul met Fia vebrent woaren.

⁵³Un wan de Priesta daut bekjikjt, un kjikj, daut Iebel aum Kjleet haft nich om sikj jejräpen, ooda aum Jewäwden ooda aum Jekjnetten, ooda aun irjent eenem von Fal jemoaktem,

⁵⁴soo saul de Priesta befälen, daut maun daut wauscht, aun waut daut Iebel es; un hee saul daut toom tweeden Mol säwen Doag enschluten.

⁵⁵Un bekjikjt de Priesta daut Iebel nom wauschen, un kjikj, daut Iebel haft sien utseenen nich veendat, un daut Iebel haft nich om sikj jejräpen, soo es daut onrein; du saust daut met Fia vebrennen; daut es deepa opp siene kole Hinja- ooda Väasied.

⁵⁶Un wan de Priesta daut bekjikjt, un kjikj, daut Iebel es nom wauschen blauss jeworden, soo saul hee daut vom Kjleet aufrieten, ooda vom Fal, ooda vom Jewäwden ooda Jekjnetten.

⁵⁷Un wan daut aum Kjleet noch jeseenen woat, ooda aum Jewäwden ooda Jekjnetten, ooda aun eenem von Fal Jemoaktem, soo es daut een utbräakjenda Utsauz; du saust daut met Fia vebrennen, aun däm daut Iebel es.

⁵⁸Un daut Kjleet, ooda daut Jewäwden ooda Jekjnetten, ooda irjent waut jemoaktet ut Fal, daut du wauschst, un daut Iebel jeit rut; daut saul toom tweeden Mol jewoschen woaren, un daut es rein.

⁵⁹Daut es daut Jesaz vom Utsauziebel aun eenem Kjleet von Woll ooda von Boomwoll, ooda aun eenem Jewäwden ooda aun eenem Jekjnetten ooda aun waut jemoaktem von Fal, om daut fa rein ooda fa onrein too erkjläaren.