Read De Bibel JHF 3. Mose 14 Bible Online

3. Mose 14 - De Bibel JHF bible

3. Mose 14

²Dit saul daut Jesaz vom Utsauzjen sennen aum Dach siene Reinjunk: Hee saul nom Priesta jebrocht woaren;

³un de Priesta saul butrem Loaga gonen; un de Priesta bekjikjt am, un kjikj, daut Iebel von Utsauz es aun däm Utsauzjen jesunt jeworden,

⁴soo saul de Priesta befälen, daut maun fa däm, dee too reinjen es, 2 läwendje, reine Väajel nämt un Zeedaholt un Karmesin un Isop.

⁵Un de Priesta saul befälen, daut maun däm eenen Voagel schlacht en eenem ieednem Jefäss äwa läwendjem [reinem] Wota.

⁶Däm läwendjen Voagel saul hee nämen, am un daut Zeedaholt un daut Karmesin un däm Isop, dit aules, un däm läwendjen Voagel en daut Voagel Bloot ducke, dee jeschlacht jeworden es äwa däm läwendjem Wota;

⁷un hee saul opp däm, dee vom Utsauz too reinjen es, säwen Mol spretzen un am fa rein erkjläaren; un däm läwendjen Voagel saul hee em frieen Flekj flieejen loten.

⁸Un dee too reinjen es, saul siene Kjleeda wauschen un aul sien Hoa schäaren un sikj em Wota boden; un hee es rein. Un nodäm doaf hee em Loaga komen, oba hee saul säwen Doag buta sienem Zelt bliewen.

⁹Un daut saul passieren, aum säwenden Dach saul hee aul sien Hoa schäaren, sien Haupt un sien Boat un siene Uagebrone; jo, aul sien Hoa saul hee schäaren un siene Kjleeda wauschen un sien Fleesch em Wota boden; un hee es rein.

¹⁰Un aum achten Dach saul hee 2 Lama nämen, onen Fäla, un een Muttalaum, eenjoasch, onen Fäla, un 3/10 fienet Mäl, jemischt met Eelj, toom Speisopfa, un een Log Eelj.

¹¹Un de Priesta, dee am reinicht, saul däm Maun, dee too reinjen es, un dise Dinj ver däm Harn stalen, aun däm Engank von Zelt de Bejäajnunk.

¹²Un de Priesta saul daut Laum nämen un brinj daut toom Schultopfa met däm Log Eelj un schwinj dee aus Wäwopfa ver däm Harn;

¹³Un hee schlacht daut Laum aun däm Uat, woa maun daut Sindopfa un daut Brauntopfa schlacht, aum heiljen Uat; dan aus daut Sindopfa, soo jehieet daut Schultopfa däm Priesta: Daut es huachheilich.

¹⁴Un de Priesta saul von däm Schultopfabloot nämen, un de Priesta doo daut opp däm sienem rajchten Uabommel, dee too reinjen es, un opp däm Dume siene rajchte Haunt un opp de groote Tee sienem rajchten Foot.

¹⁵Un de Priesta saul von däm Log Eelj nämen un jeet daut en siene linkje Haunt;

¹⁶un de Priesta duck sienen rajchten Finja en daut Eelj, daut en sien linkje Haunt es, un sprets von däm Eelj met sienem Finja säwen Mol ver däm Harn.

¹⁷Un von däm Äwajen Eelj, daut en siene Haunt es, saul de Priesta opp däm sien rajchte Uabommel doonen, dee too reinjen es, un opp däm Dume siene rajchte Haunt un opp de groote Tee sienem rajchten Foot, oppem Schultopfabloot.

¹⁸Un daut Äwaje vom Eelj, daut em Priesta siene Haunt es, saul hee opp däm sienem Haupt doonen, dee too reinjen es; un de Priesta saul Veseenunk fa am ver däm Harn doonen.

¹⁹Un de Priesta saul daut Sindopfa opfren un Veseenunk fa däm doonen, dee von siene Orreinheit too reinjen es; un doano saul hee daut Brauntopfa schlachten.

²⁰Un de Priesta saul daut Brauntopfa un daut Speisopfa opp däm Aultoa opfren. Un soo saul de Priesta Veseenunk fa am doonen; un hee es rein.

²¹Un wan hee oam es un siene Haunt daut nich brinjen kaun, soo saul hee een Laum aus Schultopfa nämen, toom Wäwopfa, om Veseenunk fa am to doonen; un een tieendel fienet Mäl, jemischt met Eelj, toom Speisopfa, un een Log Eelj;

²²un twee Turtelduwen ooda twee junge Duwen, dee siene Haunt brinjen kaun; un de eene saul een Sindopfa un de aundre een Brauntopfa sennen.

²³Un hee saul ar aum achten Dach siene Reinjunk nom Priesta brinjen aun däm Engank von Zelt de Bejäajnunk ver däm Harn.

²⁴Un de Priesta saul daut Schultopfa Laum nämen un daut Log Eelj, un de Priesta schwinj daut aus Wäwopfa ver däm Harn.

²⁵Un hee schlacht daut Schultopfa Laum; un de Priesta neem von däm Bloot vom Schultopfa un doo daut opp däm sien rajchten Uabommel, dee too reinjen es, un opp däm Dume siene rajchte Haunt un opp de groote Tee sienen rajchten Foot.

²⁶Un de Priesta jeet von däm Eelj en siene linkje Haunt;

²⁷un de Priesta sprets met sienem rajchten Finja von däm Eelj, daut en siene linkje Haunt es, säwen Mol ver däm Harn.

²⁸Un de Priesta doo von däm Eelj, daut en siene Haunt es, opp däm sien rajchten Uabommel, dee too reinjen es, un opp däm Dume siene rajchte Haunt un oppe groote Tee sienem rajchten Foot, opp de Städ vom Schultopfabloot.

²⁹Un daut Äwaje Eelj, daut em Priesta siene Haunt es, saul hee opp däm sienem Haupt doonen, dee too reinjen es, om Veseenunk fa am ver däm Harn to doonen.

³⁰Un hee saul de eene von de Turtelduwen ooda von de junge Duwen opfren, von däm, waut siene Haunt oppbrinjen kaun, —

³¹daut, waut siene Haunt brinjen kaun; de eene aus Sindopfa un de aundre aus Brauntopfa, met däm Speisopfa. Un soo doo de Priesta Veseenunk fa am ver däm Harn, dee too reinjen es.

³²Daut es daut Jesaz fa däm, aun däm daut Iebel vom Utsauz es, däm siene Haunt bie de Reinjunk nich brinjen kaun, waut väajeschräwen es.

³³Un de Har räd too Moses un to Aaron un säd:

³⁴Wan jie en daut Launt Kanaan komen, daut ekj junt toom Ieejentum jäw, un ekj een Utsauziebel aun een Hus sat en junem Ieejendoomslaunt,

³⁵soo saul dee, däm daut Hus jehieet, komen un daut däm Priesta malde un sajen: Daut sitt mie aus een Iebel aum Hus.

³⁶Un de Priesta saul befälen, daut maun daut Hus utriemt, ea de Priesta nennjeit, daut Iebel too bekjikjen, doamet nich aules onrein woat, waut em Hus es; un doano saul de Priesta nengonen, daut Hus too bekjikjen.

³⁷Un bekjikjt hee daut Iebel, un kjikj, daut Iebel es aune Wenj vom Hus, jreenliche ooda rootliche deepre Städen, un dee sent deepa aus de Waunt,

³⁸soo saul de Priesta ut däm Hus rut aun däm Hus Engank gonen un daut Hus säwen Doag veschluten.

³⁹Un de Priesta saul aum säwenden Dach wadakomen; un hee bekjikjt daut, un kjikj, daut Iebel haft aune Hus Wenj om sikj jejräpen,

⁴⁰soo saul de Priesta befälen, daut maun dee Steena, aun dän daut Iebel es, rutnämt, un dee aun eenem onreinem Uat, butre Staut, rutschmit.

⁴¹Un daut Hus saul maun von bennen runtom utkrautze, un däm Leem, däm maun aufjekrautzt haft, butre Staut, aun eenem orreinen Uat rutschedde.

⁴²Un maun saul aundre Steena nämen un dee aun de Städ de orreine ensaten, un maun saul aundren Leem nämen un daut Hus utschmäaren.

⁴³Un wan daut Iebel wadakjemt un em Hus utbrakjt nom utbräakjen de Steena un nom aufkrautze de Wenj vom Hus un nom veschmäaren,

⁴⁴soo saul de Priesta komen; un hee bekjikjt daut, un kjikj, daut Iebel haft em Hus om sikj jejräpen, soo es daut een frätenda Utsauz aum Hus; daut es onrein.

⁴⁵Un maun saul daut Hus dolrieten, siene Steena un sien Holt un aulem Leem vom Hus, un daut rutschaufen butre Staut aun eenem onreinem Uat.

⁴⁶Un wäa en daut Hus nenn jeit, soo lang daut veschloten es, woat onrein bat Oppenowent;

⁴⁷un wäa en däm Hus schlapt, saul siene Kjleeda wauschen; un wäa en däm Hus at, saul siene Kjleeda wauschen.

⁴⁸Oba wan de Priesta nennjeit un daut bekjikjt, un kjikj, daut Iebel haft nich em Hus nom veschmäaren om sikj jejräpen; soo saul de Priesta daut Hus fa rein erkjläaren; dan daut Iebel es heel jeworden.

⁴⁹Un hee saul, om daut Hus too heilje, 2 Väajel nämen un Zeedaholt un Karmesin un Isop;

⁵⁰un hee saul däm eenen Voagel schlachten un en eenem ieednem Jefäss äwa läwendjem Wota;

⁵¹un hee saul daut Zeedaholt un däm Isop un daut Karmesin un däm läwendjen Voagel nämen un däm em Bloot vom jeschlachten Voagel ennducke un en daut läwendje Wota un besprezt daut Hus säwen Mol;

⁵²un hee heilj daut Hus met däm Bloot vom Voagel un met däm läwendjen Wota un met däm läwendjen Voagel un met däm Zeedaholt un met däm Isop un met däm Karmesin;

⁵³un däm läwendjen Voagel saul hee em frieen Flekj, butre Staut, flieejen loten. Un soo doo hee Veseenunk fa daut Hus; un daut woat rein sennen.

⁵⁴Daut es daut Jesaz fa aulem Utsauziebel un fa daut Schorf,

⁵⁵un fa däm Utsauz de Kjleeda un de Hiesa,

⁵⁶un fa daut Jeschwollst un fa däm Jrint un fa de Plaken;

⁵⁷om to belieren, wanea fa onrein un wanea fa rein too erkjläaren es; daut es daut Jesaz de Utsauzje.