Read De Bibel JHF 3. Mose 17 Bible Online

3. Mose 17 - De Bibel JHF bible

3. Mose 17

¹Un de Har räd too Moses un säd:

²Räd too Aaron un to siene Säns un to aule Kjinja Israel un saj to an: Dit es daut, waut de Har befoolen un jesajcht haft:

³Jiedra Mensch ut däm Hus Israel, dee een Rind ooda een Schop ooda eene Kos em Loaga schlacht, ooda butrem Loaga schlacht,

⁴un daut nich aun däm Engank vom Zelt de Bejäajnunk jebrocht haft, om daut däm Harn aus Opfagow to brinjen ver de Wonunk Gottes, dis Maun saul daut Bloot schuldich woaren; hee haft Bloot vegoten, un dis Maun saul ute Medd von sienem Volkj utjerot woaren;

⁵om daut de Kjinja Israel äare Schlachttieren brinjen, dee see oppem frieen Flekj schlachten, daut see dee däm Harn brinjen aun däm Engank vom Zelt de Bejäajnunk nodäm Priesta un dee aus Dankopfa däm Harn schlachten.

⁶Un de Priesta saul daut Bloot aun däm Aultoa Gottes spretzen ver däm Engank von Zelt de Bejäajnunk un daut Fat rieekjren toom leeftoljen Jeroch däm Harn.

⁷Un see sellen nich mea äare Schlachtopfa fa de Dämonen schlachten, dän see nohuare. Daut saul an eene eewje Sazunk bie äare Jeschlajchta sennen.

⁸Un du saust to an sajen: Jiedra Mensch ut däm Hus Israel un von de Framde, dee en äare Medd sent, dee een Brauntopfa ooda Schlachtopfa opfat,

⁹un daut nich aum Engank vom Zelt de Bejäajnunk brinjt, om daut däm Harn too opfren, dee Maun saul ut sienem Volkj utjerot woaren.

¹⁰Un jiedra Mensch ut däm Hus Israel un von de Framde, dee en äare Medd es, dee Bloot äten woat, — jäajen de Seel, dee daut Bloot at, woa ekj mien Aunjesecht rechten un an ute Medd von äarem Volkj utroden.

¹¹Dan de Seel vom Fleesch es em Bloot, un ekj ha daut junt opp däm Aultoa jejäft, om Veseenunk fa june Seelen to doonen; dan daut Bloot es daut, daut Veseenunk fa de Seel deit.

¹²Doarom ha ekj to de Kjinja Israel jesajcht: Kjeena von junt saul Bloot äten; uk de Framda, dee en june Medd es, saul nich Bloot äten.

¹³Un jiedra Mensch von de Kjinja Israel un von de Framde, dee en june Medd es, dee een willet Tia ooda een Voagel jript, dee jejäten woaren, saul sien Bloot utranen loten un daut met Ieed bedakjen.

¹⁴Dan de Seel von aulem Fleesch; sien Bloot, daut es siene Seel; un ekj ha to de Kjinja Israel jesajcht: Jie sellen nich Fleesch met Bloot äten, dan de Seel von aulem Fleesch es sien Bloot; jiedra, dee daut at, saul utjerot woaren.

¹⁵Un jiedra, dee een Os ooda Verätnet at, hee es een Einheimischa ooda Framda, dee saul siene Kjleeda wauschen un sikj em Wota boden, un hee woat bat Oppenowent onrein sennen; dan woat hee rein sennen.

¹⁶Un wan hee siene Kjleeda nich wauscht un sien Fleesch nich boden woat, soo woat hee siene Ojjerajchtichkjeit droagen.