Read De Bibel JHF 3. Mose 18 Bible Online

3. Mose 18 - De Bibel JHF bible

3. Mose 18

¹Un de Har räd too Moses un säd:

²Räd to de Kjinja Israel un saj to an: Ekj sie de Har, jun Gott.

³Jie sellen nich doonen, aus maun em Ägiptenlaunt deit, en däm jie jewont ha, sell jie nich doonen; un nom doonen em Launt Kanaan, wuahan ekj junt brinj, sell jie nich doonen; un en äare Sazungen sell jie nich waundlen.

⁴Miene Rajchte sell jie doonen un miene Sazungen sell jie hoolen, daut jie en dee waundlen. Ekj sie de Har, jun Gott.

⁵Un miene Sazungen un miene Rajchte sell jie hoolen, derch dee de Mensch, wan hee dee deit, läwen woat. Ekj sie de Har.

⁶Kjeen Mensch saul sikj irjent eenem sien Blootfrindschauft nodakomen, om äare Schomp optodakjen. Ekj sie de Har.

⁷De Schomp von dienem Voda un de Schomp von diene Mutta saust du nich opdakjen; see es diene Mutta, du saust äare Schomp nich opdakjen;

⁸de Schomp von dienem Voda siene Fru saust du nich opdakjen; daut es de Schomp von dienem Voda.

⁹De Schomp von diene Sesta, de Dochta von dienem Voda, ooda de Dochta von diene Mutta, tus jebuaren ooda buten jebuaren, — äare Schomp saust du nich opdakjen.

¹⁰De Schomp de Dochta von dienem Sän ooda de Dochta von diene Dochta — äare Schomp saust du nich opdakjen, dan daut es diene Schomp.

¹¹De Schomp de Dochta von dienem Voda siene Fru, von dienem Voda jebuaren, — see es diene Sesta, äare Schomp saust du nich opdakjen.

¹²De Schomp de Sesta von dienem Voda saust du nich opdakjen; dan see es Blootfrindschauft von dienem Voda.

¹³De Schomp de Sesta von diene Mutta saust du nich opdakjen, dan see es Blootfrindschauft von diene Mutta.

¹⁴De Schomp vom Voda sienem Brooda saust du nich opdakjen; du saust nich no siene Fru gonen, dan see es diene Taunte.

¹⁵De Schomp von diene Schwiadochta saust du nich opdakjen; see es de Fru von dienem Sän, äare Schomp saust du nich opdakjen.

¹⁶De Schomp vom Brooda siene Fru saust du nich opdakjen; daut es de Schomp von dienem Brooda.

¹⁷De Schomp von eene Fru un äare Dochta saust du nich opdakjen; de Dochta von äarem Sän un de Dochta von äare Dochta saust du nich nämen, om äare Schomp optodakjen; see sent Blootfrindschauft; daut es eene Schaunddot.

¹⁸Un du saust nich eene Fru too äare Sesta nämen, ar aufjenstich tomoaken, endäm du äa Schomp opdakjst, bie äarem Läwen.

¹⁹Du saust nich no de Fru gonen, wan see Moonatfluss haft, om äare Schomp optodakjen.

²⁰Un bie de Fru von dienem Näakjsten saust du nich ligjen, uk nich dien Somen [om daut see nich schwanga woat], daut du derch ar onrein woascht.

²¹Un von diene Kjinja saust du kjeent hanjäwen, om däm Moloch derch daut Fia gonen to loten, un du saust däm Nomen Gottes, dienem Gott, nich entheiljen. Ekj sie de Har.

²²Un bie eenem Maun saust du nich ligjen, aus maun bie eene Fru licht; daut es een Aufschu. 18,

²³Un bie eenem Vee saust du nich ligjen, soo daut du die aun am veonreinichst; un eene Fru saul sikj nich ver eenem Vee hanstalen, om met am to schaufen to haben; daut es eene schentelje Schaunddot.

²⁴Veonreinicht junt nich derch aul dit; dan derch aul dit ha de Nazionen sikj veonreinicht, dee ekj ver junt vejoag.

²⁵Un daut Launt wort veonreinicht, un ekj sieekj siene Ojjerajchtichkjeit too bestrofen, un daut Launt spieech siene Bewona ut.

²⁶Oba jie, jie sellen miene Sazungen un miene Rajchte hoolen, un jie sellen aul disem Aufschu nich doonen, de Einheimischa un de Framda, dee en june Medd es, —

²⁷dan aul dise Aufschu ha de Laundslied jedonen, dee ver junt wieren, un daut Launt es veonreinicht jeworden, —

²⁸doamet daut Launt junt nich utspicht, wan jie daut veonreinjen, soo aus daut de Nazion utjespäajen haft, dee ver junt wia;

²⁹dan jiedra, dee eent von aul dise Aufschu deit, dee Seel, dee daut deit, saul utte Medd von mienem Volkj utjerot woaren.

³⁰Un jie sellen miene Väaschreften hoolen, daut jie kjeene von dise Aufschudoten doonen, dee ver junt jedonen worden sent, un junt nich doaderch veonreinjen. Ekj sie de Har, jun Gott.